У Беларусі інспекцыя МАГАТЭ праверыць БелАЭС і інстытут “Сосны”

20 лістапада, Позірк. У Беларусі 20–21 лістапада працуе інспекцыя Міжнароднага агенцтва па атамнай энергіі (МАГАТЭ), паведамляе Дэпартамент па ядзернай і радыяцыйнай бяспецы МНС (Дзяржатамнагляд).

Адзначаецца, што гэты візіт праходзіць у рамках “выканання [Мінскам] міжнародных абавязацельстваў па Пагадненню аб гарантыях”.

“20 лістапада на Беларускай АЭС і 21 лістапада ў навуковай установе “АІЭЯД-Сосны” (Аб’яднаны інстытут энергетычных і ядзерных даследаванняў, Мінскі раён. — “Позірк”.) праходзяць чарговыя планавыя інспекцыі МАГАТЭ, у рамках якіх запланавана правядзенне фізічнай інвентарызацыі ядзернага матэрыялу і праверка вядзення справаздачнай дакументацыі”, — гаворыцца ў рэлізе.

Беларусь з’яўляецца ўдзельнікам Пагаднення аб прымяненні гарантый у сувязі з Дагаворам аб нераспаўсюджванні ядзернай зброі, якое было заключана з МАГАТЭ 14 красавіка 1995 года.

Гарантыі МАГАТЭ з’яўляюцца неад’емным складальнікам міжнароднай сістэмы бяспекі і ўяўляюць сабой комплекс тэхнічных мер, якія прымяняюцца адносна ядзерных установак і ядзернага матэрыялу, якія выкарыстоўваюцца дзяржавамі.

Аперацыйныя работы, якія праходзяць на Беларускай АЭС, “цалкам адпавядаюць міжнародным нормам і стандартам”, заявіў генеральны дырэктар Міжнароднага агенцтва па атамнай энергіі (МАГАТЭ) Рафаэль Гросі пасля візіту на станцыю 1 кастрычніка.

11 верасня стала вядома, што расійскі нацыянальны аператар па абыходжанні з радыеактыўнымі адходамі (ФГУП “НА РАТ”, уваходзіць у склад дзяржаўнай карпарацыі “Расатам”) у 2025 годзе прапануе Беларусі на разгляд тры пляцоўкі для ўзвядзення пункта пахавання радыеактыўных адходаў з Беларускай АЭС.

Літва неаднаразова выказвала трывогу наконт бяспекі БелАЭС. Увесну гэтага года Вільнюс правёў вучэнні дзяржаўнага ўзроўню па забеспячэнні грамадзянскай бяспекі ў выпадку ядзернай аварыі на станцыі.

Збудаванне БелАЭС ля Астраўца (Гродзенская вобласць) завяршылася восенню 2023 года. Станцыя пабудавана па расійскім праекце, генеральным падрадчыкам выступіў “Расатам”.

Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзены ў чэрвені 2021-га і лістападзе 2023-га адпаведна.