Кіраўнік Мінгарвыканкама даручыў звярнуць “асаблівую ўвагу” на прафілактыку карупцыі ў будаўніцтве, адукацыі і ЖКГ

25 лістапада, Позірк. Звярнуць “асаблівую ўвагу” на прафілактыку карупцыйных правапарушэнняў у будаўнічай галіне, сістэме адукацыі і жыллёва-камунальнай гаспадарцы (ЖКГ) даручыў старшыня Мінгарвыканкама Уладзімір Кухараў на пасяджэнні камісіі па супрацьдзеянні карупцыі.

Як паведамляе прэс-служба выканкама, пасяджэнне прайшло ў пашыраным фармаце пры ўдзеле кіраўніцтва органа выканаўчай улады і раённых адміністрацый, старшыні Следчага камітэта Дзмітрыя Горы, пракурора Мінска Алега Лаўрухіна і інш. Сярод іншага былі разгледжаныя “пытанні эфектыўнасці мерапрыемстваў па прафілактыцы карупцыйных правапарушэнняў у арганізацыях будаўнічай галіны горада”.

Кухараў “завастрыў увагу прысутных на тым, што да тэмы прафілактыкі карупцыі трэба паставіцца вельмі сур’ёзна і даходліва давесці інфармацыю да падначаленых”. У прыватнасці, “арганізаваць адпаведнае навучанне службовых асоб, праводзіць усе закупкі праз тэндары, стварыць у сістэме ЖКГ уласныя падраздзяленні па бягучым рамонце”.

“У напрамку процідзеяння карупцыі праводзіцца вялікая праца. Разам з тым часам выяўляюцца яе выпадкі. Таму кожны з нас на сваім месцы павінен зрабіць усё неабходнае, што прадугледжвае заканадаўства для ліквідацыі прычын карупцыі. І ключавое тут — менавіта прычыны. Мы можам іх ліквідаваць сістэмнай, планамернай працай”, — заявіў чыноўнік.

Як заявіў кіраўнік СК, “карупцыя — гэта зло”, і, нягледзячы на тое, што яна займае “ўсяго 1,5% у структуры ўсіх правапарушэнняў”, яна “прыносіць велізарную шкоду”.

“Мы павінны зрабіць усё, каб гэтага не адбывалася. І кожная службовая асоба павінна разумець і ведаць: злачынствы дадзенай катэгорыі рана ці позна выкрываюцца”, — адзначыў Гора.

13 лістапада на семінары, прысвечаным пытанням удасканалення процідзеяння карупцыі ў дзяржаўных органах і арганізацыях, начальнік упраўлення па барацьбе з карупцыяй і арганізаванай злачыннасцю Генеральнай пракуратуры Ігар Грэйба заявіў, што за студзень — верасень 2024 года ў Беларусі зарэгістравана 1.058 карупцыйных злачынстваў.

Паводле яго слоў, сёлета колькасць карупцыйных злачынстваў знізілася на 87 (за аналагічны перыяд 2023-га — 1.145; -7,6%).

Прадстаўнік нагляднага органа падкрэсліў, што “дзякуючы прымаемым мерам стрымлівання і ранняй прафілактыкі” карупцыя “не перавышае 2% у структуры агульнай злачыннасці”.

На прэс-канферэнцыі 16 кастрычніка прадстаўнік упраўлення па барацьбе з карупцыяй і арганізаванай злачыннасцю Генпракуратуры Арцём Ігнаценка паведаміў, што ў 2023 годзе “ўлічана 1.253 карупцыйныя злачынствы, да адказнасці прыцягнута 924 асобы”.

Ён таксама адзначыў, што за студзень — верасень 2024 года “ўстаноўлена 720 крымінальна каральных дзеянняў гэтай катэгорыі і 623 асобы, якія іх учынілі”.

Найбольш уразлівымі для “карупцыйнага пранікнення” сферамі Ігнаценка назваў сельскую гаспадарку, прамысловасць, гандаль і дзяржаўнае кіраванне.