Падсанкцыйны “Беллеспаперапрам” абмеркаваў стварэнне новых цэлюлозна-папяровых вытворчасцяў з неназваным міжнародным холдынгам

25 лістапада, Позірк. Сустрэча з прадстаўнікамі “міжнароднага холдынгу, зацікаўленага ў будаўніцтве ў Беларусі прадпрыемстваў па выпуску беленай хіміка-тэрмамеханічнай масы”, якая выкарыстоўваецца пры вытворчасці паперы і кардона, адбылася ў канцэрне “Беллеспаперапрам”, паведаміла прэс-служба ведамства 25 лістапада.

“Мы адкрытыя для супрацоўніцтва”, — заявіў старшыня канцэрна Аляксандр Пшонны “падчас прывітання міжнароднай дэлегацыі”.

Якую краіну і холдынг прадстаўляюць інвестары, “Беллеспаперапрам” не паведаміў, не названыя таксама імёны прадстаўнікоў холдынгу, якія прыбылі.

Праект “цікавы тым, што дазволіць дадаткова ўцягнуць у абарот краіны нізкатаварную драўняную сыравіну, а таксама стварыць новыя высокапрадукцыйныя працоўныя месцы”, сцвярджаецца ў прэс-рэлізе.

У канцэрне таксама чакаюць, што планаваная вытворчасць “будзе на 100% экспартна арыентаванай”.

2 сакавіка 2022 года супраць афіцыйнага Мінска быў уведзены пакет санкцый ЕС, які сярод іншага прадугледжваў забарону на экспарт прадукцыі дрэваапрацоўкі, у тым ліку піламатэрыялаў, брыкетаў, паліўных гранул, фанеры і драўняных пліт.

8 сакавіка таго ж года Міжнародны савет дырэктараў FSC (Лясны апякунскі савет — міжнародная арганізацыя, якая адказвае за выкананне стандартаў у кіраванні лясамі і лесапрадукцыяй), прыняў рашэнне прыпыніць сертыфікацыю экспарту прадукцыі дрэваапрацоўкі і лясной гаспадаркі Беларусі і Расіі з-за агрэсіі супраць Украіны.

Пастановай урада № 140 ад 16 сакавіка 2022 года была спрошчаная працэдура продажу на экспарт некаторых відаў прадукцыі дрэваапрацоўкі. У прыватнасці, прыпынена патрабаванне па абавязковым біржавым гандлі паліўнай драўнінай, піламатэрыяламі (выключэнне ўмовы абавязковага біржавога гандлю дранкай на экспарт). Прыпынена прымяненне вывазных мытных пошлін на асобныя віды прадукцыі дрэваапрацоўкі пры іх рэалізацыі на экспарт (дранка, піламатэрыялы за выключэннем неабрэзаных, ДВП, ДСП, АСП, фанера).

Міхаіл Касько, які займаў тады пасаду старшыні “Беллеспаперапрама”, заявіў, што пад еўрапейскія санкцыі трапіла амаль палова аб’ёму экспарту прадукцыі канцэрна. “Вядома, мы павінны разумець, што санкцыі нас не маглі не закрануць, паколькі звыш 40% экспарту прадукцыі, якую прадпрыемствы канцэрна выраблялі, адпраўлялася на рынкі Еўрапейскага саюза”, — сказаў ён.

5 снежня 2023 года ЗША ўвялі новыя санкцыі супраць беларускіх фізічных і юрыдычных асоб. У спіс кампаній, уключаных у пакет, быў “Беллеспаперапрам”.

Сёлета 4 красавіка на пасаду старшыні канцэрна быў узгоднены Аляксандр Пшонны, да таго намеснік старшыні. Яго начальнік Касько 4 студзеня быў прызначаны амбасадарам у Індыі з завуаляванымі прэтэнзіямі з боку Аляксандра Лукашэнкі.