Лукашэнка заявіў пра “права палестынскага народа на стварэнне незалежнай дзяржавы”

26 лістапада, Позірк. Пра “права палестынскага народа на самавызначэнне і стварэнне незалежнай дзяржавы” заявілі ў сумеснай заяве Аляксандр Лукашэнка і прэм’ер-міністр Пакістана Шахбаз Шарыф.

Як паведамляе прэс-служба Лукашэнкі, гэта права павінна быць рэалізавана “на аснове двухдзяржаўнай формулы ў адпаведнасці з рашэннямі Савета бяспекі і Генеральнай асамблеі ААН”.

У заяве таксама гаворыцца аб неабходнасці “неадкладнага і пастаяннага спынення баявых дзеянняў без папярэдніх умоў у сектары Газа і Ліване” і аб “забеспячэнні бесперабойнай і бяспечнай дастаўкі гуманітарнай дапамогі, стрыманасці на фоне пагрозы пашырэння зоны канфлікту”.

Акрамя гэтага, Лукашэнка і Шарыф падкрэслілі “першарадную важнасць мірнага ўрэгулявання канфлікту ва Украіне, неабходнасць дыпламатычных намаганняў і канструктыўнага дыялогу”.

“Абодва лідары заклікалі ўсе ўцягнутыя бакі аддаць прыярытэт перамовам і мірным сродкам вырашэння ўсіх асноўных праблем, пацвердзіўшы сваю прыхільнасць падтрымцы ініцыятыў, якія спрыяюць трываламу міру і стабільнасці ў рэгіёне”, — адзначаецца ў супольнай заяве.

Сітуацыя на Блізкім Усходзе рэзка абвастрылася, калі 7 кастрычніка 2023 года на тэрыторыю Ізраіля з сектара Газа ўварваліся баевікі ваеннага крыла руху ХАМАС. Адначасова з Газы пачаўся інтэнсіўны ракетны абстрэл ізраільскай тэрыторыі. У выніку тэрарыстычнай атакі ў Ізраілі загінула 1,2 тыс. чалавек з 37 краін, у тым ліку трое грамадзян Беларусі; пацярпела 7,3 тыс.

У адказ Ізраіль пачаў ваенную аперацыю. Міністэрства аховы здароўя Газы (дзейнічае пад кантролем ХАМАС) заяўляе, што ў выніку ізраільскай аперацыі мінулага года забіта каля 44 тыс. чалавек, паранена каля 105 тыс. Паводле даных Міністэрства аховы здароўя Палестынскай аўтаноміі, якія ААН лічыць дакладнымі, больш за 39% забітых у Газе — мужчыны прызыўнога ўзросту, 19% — жанчыны, 32% — непаўналетнія, больш за 8% — пажылыя (ад 60 гадоў). Ізраіль заяўляе, што з пачатку вайны ў Газе ліквідавана або ўзята ў палон каля 14 тыс. баевікоў і іх камандзіраў. ХАМАС прызнае гібель прыкладна 6 тыс. баевікоў. 16 кастрычніка 2024 года на поўдні сектара Газы быў забіты лідар ХАМАС Ях’я Сінуар.

Паводле звестак ААН, каля 1,7 млн жыхароў сектара Газа было вымушана пакінуць свае дамы. 1,3 млн перамешчаных жыхароў Газы пражывае ў сховішчах на поўдні сектара.

23 верасня гэтага года пачалася новая фаза ізраільска-ліванскага супрацьстаяння: у Ліване былі атакаваныя тысячы цэляў, Міністэрства аховы здароўя краіны паведамляла пра сотні забітых і тысячах параненых. Ваенная аперацыя ў Ліване атрымала назву “Стрэлы поўначы”. 27 верасня ў прыгарадзе Бейрута быў атакаваны галоўны штаб праіранскай групоўкі “Хізбала”, якая ажыццяўляе перманентныя ракетныя абстрэлы ізраільскай тэрыторыі. У выніку загінуў яе лідар Хасан Насралла і многія іншыя кіраўнікі і камандзіры.

1 кастрычніка 2024 года Іран атакаваў Ізраіль, выпусціўшы сотні балістычных ракет. У той жа дзень было афіцыйна абвешчана аб пачатку наземнай аперацыі Ізраіля ў Ліване.

24 лютага 2022 года Расія пачала поўнамаштабную вайну супраць Украіны. Рэжым Лукашэнкі прадаставіў арміі РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.