Колькасць спраў аб банкруцтве вырасла ў Мінску за год амаль на 60%

27 лістапада, Позірк. На 1 кастрычніка ў Беларусі адкрыта 975 спраў аб банкруцтве, вынікае са звестак, апублікаваных Міністэрствам эканомікі.

Больш за ўсё колькасць такіх спраў вырасла за год (з 1 кастрычніка 2023 года па 1 кастрычніка 2024-га) у Мінску — на 58,2%. У Брэсцкай вобласці рост склаў 56,1%, у Мінскай — колькасць не змянілася. У іншых рэгіёнах адзначана змяншэнне: у Гродзенскай вобласці — на 18,8%, Віцебскай — на 25,7%, Магілёўскай — на 26,8%, Гомельскай — на 34,4%.

У Мінску на 1 кастрычніка разглядалася 451 справа (416 у дачыненні да юрыдычных асоб, 35 — ІП). Далей ідуць: Мінская вобласць — 158 (132; 26), Брэсцкая — 90 (57; 33), Гомельская — 87 (83; 4), Віцебская — 70 (46; 24), Гродзенская — 61 (54; 7), Магілёўская — 58 (53; 5).

40,6% спраў аб банкруцтве вядзецца ў гандлі (год таму — 37,8%), 14,2% (12,5%) — у будаўніцтве, 10,5% (12,7%) — у сферы транспарту, 9,4% (13,3%) — у прамысловасці, 4,4% (3,9%) — у сельскай гаспадарцы. На астатнія галіны прыпадае 20,9% такіх спраў (19,8%).

На 1 лістапада 2024 года ў судах знаходзілася 355 спраў аб эканамічнай неплацежаздольнасці (банкруцтве), вынікае з інфармацыі Вярхоўнага суда.

Для параўнання: на 1 кастрычніка ў судах было 371 такая справа, на 1 верасня — 362, на 1 жніўня — 375, на 1 ліпеня — 335, на 1 чэрвеня — 294, на 1 траўня — 262, на 1 лістапада 2023 года — 486. Такім чынам, за месяц іх колькасць зменшылася на 4,31%, у гадавым вымярэнні — на 26,95%.

Банкруцтва арганізацый прыватнай формы ўласнасці тычылася 349 спраў (месяцам раней — 362), горадаўтваральных і бюджэтаўтваральных дзяржаўных арганізацый — 28 (29).