Першае месца літаратурнай прэміі Гедройця 2024 года прысуджана Валянціну Акудовічу

26 лістапада, Позірк. Першае месца літаратурнай прэміі імя Ежы Гедройця 2024 года прысуджана Валянціну Акудовічу за кнігу “Трэба паказаць Сізіфа шчаслівым” (выдавецтва “Логвінаў”).

Цырымонія ўзнагароджання адбылася 26 лістапада ў Гданьску.

Журы адзначыла ў творы Акудовіча “змястоўную і шырокую панараму інтэлектуальнага жыцця Беларусі”.

Другое месца заняла Ганна Янкута за кнігу “Час пустазеля” (выдавецтва” Янушкевіч”) “за сумленнае апавяданне зацікаўленага назіральніка і ўдзельніка сучаснай гісторыі”.

Трэцяе месца прысуджана Змітру Бартосіку з кнігай “Забіць упалмінзага” (“Радыё Свабодная Эўропа / Радыё Свабода”). Аўтар адзначаны за “асвятленне беларускай гісторыі”.

Выбарам рэдакцыі “Еўрарадыё”, аднаго з партнёраў конкурсу, стаў твор “Гарэзлівы пацалунак. Кніга другая” (“Янушкевіч”). Кніга будзе выдадзеная ў аўдыёфармаце.

Пасля 2020 года колькасць новых кніг, пададзеных на літаратурную прэмію Ежы Гедройця, скарацілася на траціну, было заяўлена на прэс-канферэнцыі арганізатараў цырымоніі ўручэння прэміі 12 лістапада.

Паводле іх слоў, колькасць новых кніг імкліва скарачаецца. У 2013 годзе на прэмію было пададзеныя 43 новыя кнігі, у 2014-м — 46, у 2015-м — 42. Сёлета на ўдзел у прэміі было пададзена толькі 14 кніг, а за апошнія тры гады — 50.

Прэмія Гедройця — найбуйнейшая незалежная літаратурная прэмія Беларусі, уручаецца за найлепшую кнігу мастацкай і дакументальнай прозы на беларускай мове. Прэмію заснавалі амбасада Польшчы ў Беларусі, Польскі інстытут у Мінску, Беларускі ПЭН-цэнтр і Саюз беларускіх пісьменнікаў (апошнія дзве арганізацыі ліквідаваныя ў Беларусі і адроджаныя за яе межамі).

На хвалі рэпрэсій пасля 2020 года беларускія ўлады ліквідавалі ўсе асноўныя незалежныя выдавецтвы, якія выпускалі сучасную беларускую літаратуру. Многія выдаўцы вымушана эмігравалі і працягнулі сваю справу за мяжой.