Лукашэнка на саміце АДКБ заявіў пра мілітарызацыю Усходняй Еўропы і “НАТОфікацыю” свету
28 лістапада, Позірк. Абстаноўка ў свеце “толькі пагаршаецца”, заявіў Аляксандр Лукашэнка 28 лістапада ў Астане (Казахстан) на сесіі Савета калектыўнай бяспекі Арганізацыі Дагавора аб калектыўнай бяспецы.
“Праблема нават не ў тым, што сістэма стрымак, проціваг, якая гарантавала міжнародную бяспеку і стратэгічную стабільнасць, адышла ў нябыт, — цытуе спікера яго прэс-служба. — Мы недаравальна доўга разгойдваемся, каб стварыць альтэрнатыўныя прававыя механізмы”.
Лукашэнка выказаў меркаванне, што “некаму выгадна, калі нормы і прынцыпы міжнароднага права падмяняюцца нейкімі суб’ектыўнымі і сітуацыйна зменлівымі правіламі, інструментамі вайсковага і інфармацыйнага шантажу”.
На гэтым фоне, сцвярджае ён, “імкліва набірае абароты” гонка ўзбраенняў: “Працягвае мілітарызавацца Усходнееўрапейскі рэгіён, асабліва Польшча. Ідзе НАТОфікацыя Еўропы і свету ў цэлым”.
Паводле сцвярджэння спікера, Захад “траціць усе сілы на барацьбу з фальшывымі праблемамі”, “прычым гэтыя фальшыўкі яны самі і ствараюць”. “У той час як у сучасным свеце маецца мноства транснацыянальных выклікаў і пагроз, з якімі можна і трэба змагацца. І толькі разам”, — заявіў ён.
Прыкладам “фальшывай праблемы” Лукашэнка назваў кліматычны парадак дня, які заходнія палітыкі, на яго думку, “даўно ператварылі ў бізнес”. “Модная “Зялёная здзелка” Еўрасаюза — не што іншае, як праект нядобрасумленнай канкурэнцыі, які працуе выключна ў інтарэсах краін Захаду, што стаяць у першым шэрагу адказных за забруджванне атмасферы. Дарэчы, пра гэта ўжо шмат хто кажа”, — заявіў спікер, не канкрэтызаваўшы, хто гэтыя “многія”.
Варта адзначыць, што паводле лістападаўскіх даных сэрвісу Statista, у першай пяцёрцы краін з найбольшымі выкідамі вуглякіслага газу ў 2023 годзе былі Кітай, ЗША, Індыя, Расія і Японія (у парадку змяншэння).
Лукашэнка занепакоены перспектывамі “некантраляванага выкарыстання магчымасцяў штучнага інтэлекту”, які “ўсё часцей выкарыстоўваюць для планавання і вырашэння ваенных задач”. “Маючы здольнасць да саманавучання, гэты інструмент можа загубіць чалавецтва, калі яго выпусціць з-пад кантролю”, — лічыць ён.
Праблему спікер бачыць таксама ў кіберпагрозах і сітуацыі з інфармацыйнай бяспекай. “З аднаго боку, сучасныя тэхналогіі ствараюць тысячы новых магчымасцяў і перспектыў. З іншага боку, яны спараджаюць мноства рызык і пагроз — фейкі, дэзінфармацыя, атакі на крытычную інфраструктуру”, — сказаў ён.
Адметна, што ў “фейках, дэзінфармацыі, атаках на крытычную інфраструктуру”, пра якія кажа Лукашэнка, небеспадстаўна абвінавачваюць галоўнага саюзніка афіцыйнага Мінска — Расію. Не згадаў спікер і пра тое, што краіны рэгіёна пачалі нарошчваць свой абаронны патэнцыял, рэагуючы на развязаную РФ поўнамаштабную вайну супраць Украіны, у якой беларускія ўлады падтрымліваюць Крэмль.
Паводле слоў Лукашэнкі, прапанаваная афіцыйным Мінскам “ідэя Хартыі разнастайнасці і шматпалярнасці ў XXI стагоддзі” скіраваная на “фармаванне справядлівага светапарадку, заснаванага на прынцыпах раўнапраўя, суверэнітэту, непадзельнасці бяспекі і павагі разнастайнасці шляхоў развіцця”.
“Ключ да вырашэння наяўных праблем і стварэння эфектыўных механізмаў гарантавання бяспекі знаходзіцца ў нашай Еўразіі, з яе тысячагадовым досведам сумеснага жыцця розных народаў, узаемапранікнення культур і цывілізацый. У новай парадыгме міжнародных стасункаў АДКБ павінна стаць адной з фармаваных ваенна-палітычных апор архітэктуры бяспекі Еўразійскага кантынента, задаваць трэнд усяму парадку дня рэгіянальнай бяспекі”, — заявіў ён.
У саміце АДКБ удзельнічалі прадстаўнікі пяці з шасці краін блока — Беларусі, Казахстана, Расіі, Таджыкістана і Кыргызстана. Арменія, у якой назапасіліся прэтэнзіі да АДКБ, замарозіла свой удзел у ёй.
Лукашэнка заявіў, што адсутнасць Ерэвана на саміце “характарызуе цяперашнюю геапалітычную сітуацыю ў рэгіёне” і “ў нейкай ступені” саму арганізацыю”.