Больш за ўсё беларускіх студэнтаў вучыцца ў Расіі і Польшчы — даследаванне
29 лістапада, Позірк. Асноўнымі напрамкамі студэнцкай эміграцыі беларусаў застаюцца Расія і Польшча. Да такой высновы прыйшлі аўтары даследавання, праведзенага інстытутам “Палітычная сфера”.
Колькасць студэнтаў у Беларусі зніжаецца прыкладна на 5% у год. За апошнія дзесяць гадоў ад 400 тыс. студэнтаў засталося крыху больш за 200 тыс., паведамілі на прэзентацыі 29 лістапада дырэктар “Палітычнай сферы” Андрэй Казакевіч і даследчык інстытута Лізавета Пракопчык.
“Беларускія студэнты не зацікаўленыя ў беларускай адукацыі з тых ці іншых прычын. Колькасць беларускіх студэнтаў за мяжой расце пасля 2020-га, а ў Польшчы — пасля 2022 года. Усе тыя краіны, пра якія гаворыцца ў даследаванні, даюць бясплатную адукацыю беларусам, калі будзеш навучацца на мясцовай мове”, — адзначыла Пракопчык.
Паводле даследавання, прывабнасць заходнееўрапейскай адукацыі для беларускіх абітурыентаў вельмі высокая, і цікавасць працягвае расці нягледзячы на тое, што стасункі Беларусі з суседнімі краінамі за апошнія гады значна пагоршыліся. Калі ў 2013 годзе ў Еўропе вучылася каля 10 тыс. студэнтаў з Беларусі, то ў 2023-м іх было больш за 18 тыс. Заахвочвальнымі матывамі для выезду стаў палітычны крызіс 2020 года ў Беларусі і пачатак поўнамаштабнай вайны Расіі супраць Украіны ў 2022-м. Найбольш прывабнымі краінамі для атрымання адукацыі ў беларусаў лічацца Польшча, Літва, Германія і Чэхія.