Іск Літве выстаўлены “з халодным разлікам” на поўную кампенсацыю — кіраўнік “Беларуськалія”

3 снежня, Позірк. У іску супраць Літвы ў рамках міжнароднага інвестыцыйнага арбітражу “Беларуськалій” выстаўляе свае прэтэнзіі “з халодным разлікам”, каб дабіцца ад адказчыка “поўнага кампенсавання” выдаткаў, заявіў дзяржаўным СМІ генеральны дырэктар прадпрыемства Андрэй Рыбакоў.

Паводле яго слоў, прадпрыемства, “перафарматаваўшы лагістыку”, цяпер працуе “ў спакойным рэжыме” і выходзіць на міжнародны рынак “з пастаўкамі калійных угнаенняў у неабходным аб’ёме”.

“Гэтая іскавая заява не з’яўляецца аўральнай ці запаленай, мы не маем форс-мажору, — сказаў Рыбакоў. — Гэта халоднае, абдуманае рашэнне па прыцягненні да адказнасці за беспрэцэдэнтнае парушэнне нашых правоў. Адпрацаваўшы некалькі гадоў у новым фармаце, выбудаваўшы новыя механізмы і лагістычныя рашэнні, мы больш дакладна ацанілі нанесеную нам шкоду”.

Кіраўнік прадпрыемства дадаў, што іскавая заява “падрыхтаваная прафесійнымі юрыстамі”, яе мэтай з’яўляецца дэманстрацыя таго, што “парушэнне правоў не можа быць беспакараным” і на яго “заўсёды будзе адказ” з боку Беларусі.

“Акрамя таго, мы хочам дамагчыся кампенсацыі шкоды. Сума вельмі значная, яна будзе аналізавацца ўсімі бакамі і падчас працэсу будзе абмяркоўвацца і ўзважвацца. У заяве прыведзеныя ўсе неабходныя разлікі, усё дакладна і зразумела, на наш погляд. Канчатковае рашэнне за арбітражам”, — падсумаваў Андрэй Рыбакоў, не ўдакладніўшы памер шкоды.

Прэс-служба ААТ “Беларуськалій” 3 снежня паведаміла, што ў рамках міжнароднага інвестыцыйнага арбітражу пададзена іскавая заява ў сувязі з “незаконнымі дзеяннямі” Літвы. У выніку гэтых дзеянняў, як сцвярджаецца, “былі парушаныя правы” прадпрыемства як замежнага інвестара, абароненыя пагадненнем паміж урадамі Беларусі і Літвы аб заахвочванні і абароне інвестыцый.

Сейм Літвы дэнансаваў згаданае пагадненне 1 кастрычніка, аднак палажэнні дакумента дзейсныя на працягу года пасля афіцыйнага апавяшчэння Мінска літоўскім бокам аб прынятым рашэнні. Пра тое, калі менавіта было накіраванае адпаведнае апавяшчэнне і ці накіраванае наогул, не паведамлялася.

Варта адзначыць, што ажыццёўленыя ў рамках пагаднення інвестыцыі павінны абараняцца яшчэ на працягу 10 гадоў пасля апавяшчэння.

18 верасня стала вядома, што Суд Еўрапейскага саюза адхіліў іскі аб зняцці санкцый, пададзеныя вытворцам угнаенняў ААТ “Беларуськалій”.