МЗС Літвы афіцыйна апавясціла беларускі бок пра дэнансацыю пагаднення аб мытным супрацоўніцтве
Ілюстрацыйнае фота: Дзяржпагранкамітэт
4 снежня, Позірк. Міністэрства замежных спраў Літвы паведаміла беларускай амбасадзе ў Вільнюсе пра дэнансацыю пагаднення аб мытным супрацоўніцтве, гаворыцца ў прэс-ржлізе Дзяржаўнага мытнага камітэта (ДМК).
Дакумент спыніць нарматыўнае дзеянне 27 траўня 2025 года. ДМК падкрэслівае, што пагадненне тычыцца “ўзаемадзеяння ў многіх сферах — ад ажыццяўлення мытнага кантролю і абмену інфармацыяй да правядзення сумесных мерапрыемстваў па спыненні незаконнага абароту наркатычных сродкаў і псіхатропных рэчываў”.
Беларускае ведамства адзначае, што ” фактычнае супрацоўніцтва літоўскі бок завяршыў ужо 2,5 года таму”, аднак не канкрэтызуе, з якой прычыны гэта адбылося.
“Мытныя органы Беларусі, у сваю чаргу, да апошняга прапаноўвалі магчымыя варыянты ўзаемадзеяння, якія сумежны бок ігнараваў”, — заявіў ДМК, усклаўшы адказнасць на “літоўскіх палітыкаў, якія не настроеныя на ўзаемадзеянне нашых краін”.
ДМК паскардзіўся на тое, што на беларуска-літоўскай мяжы “паводле аднабаковага рашэння Літвы функцыянуе толькі два пункты пропуску, у якіх пастаянна знаходзяцца сур’ёзныя чэргі з-за нерытмічнага прыёму транспарту сумежным бокам”. Прычыну закрыцця Літвой памежных пераходаў беларускі бок таксама не назваў.
Беларуская мытня, падкрэслівае камітэт, “нават пасля такога кроку (дэнансацыя пагаднення. — “Позірк”.) гатовая да адкрытага і раўнапраўнага дыялогу па мытных пытаннях”.
12 лістапада Сейм Літвы дэнансаваў пагадненне з урадам Беларусі аб супрацоўніцтве ў барацьбе з мытнымі злачынствамі. За прыняцце адпаведнага закона прагаласавала 93 парламентары, два ўстрымаліся.
У тлумачальнай запісцы да дакумента адзначалася, што ў адміністрацыйных спрэчках асобы, якія вядуць гандаль з Мінскам, падаюць мытным органам Літвы і судам дакументы, выдадзеныя мытнымі органамі Беларусі, “у якасці доказу таго, што мытныя працэдуры праведзеныя належным чынам, гандаль з’яўляецца законным і што такая дзейнасць не парушае міжнародныя санкцыі, уведзеныя ў дачыненні да Беларусі”.
Цяпер мытныя органы Літвы павінны прызнаваць доказы, прадстаўленыя на падставе пагаднення, якое дэнансуецца, такімі, што не падлягаюць праверцы.
Міністр фінансаў Гінтарэ Скайстэ 15 кастрычніка, у дзень, калі праект быў прыняты парламентам да разгляду, заявіла (https://aianalyticsweb.com/be/news/109576/), што дэнансаваць пагадненне, як і шэраг папярэдніх дакументаў, мэтазгодна, паколькі з пачатку ваеннай агрэсіі Расіі супраць Украіны мытная служба Літвы не супрацоўнічае з беларускімі мытнымі органамі, не адбываецца абмен інфармацыяй.
25 верасня ўрад Літвы ўхваліў (https://aianalyticsweb.com/be/news/106569/) падрыхтаваныя Міністэрствам фінансаў праекты прававых актаў аб дэнансацыі пагадненняў аб мытным супрацоўніцтве з Беларуссю і Расіяй.
16 верасня паведамлялася (https://aianalyticsweb.com/ru/news/105178/), што прэзідэнт Літвы Гітанас Наўседа ўнёс у Сейм прапанову аб дэнансацыі трох дамоваў з Расеяй і Беларуссю, якія тычацца эканамічнага супрацоўніцтва.
18 жніўня 2023 года Літва закрыла пункты пропуску Шумскас (з беларускага боку Лоша) і Твярачус (Відзы) у адказ на магчымыя вайсковыя пагрозы з боку Беларусі, у тым ліку праз баевікоў расійскай прыватнай вайсковай кампаніі “Вагнер”, якія знаходзіліся тады ў Беларусі, 1 сакавіка 2024-га — Лаварышкес (Катлоўка) і Райгардас (Прывалка) для больш пільнага кантролю і праверак замежнікаў, якія ўязджаюць.
На мяжы з Беларуссю працягваюць працаваць два памежныя пераходы — Мядзінінкай і Шальчынінкай.