З пачатку года ў Беларусі ад агню загінула больш за 500 чалавек

5 снежня, Позірк. Тры чалавекі загінула на пажарах у Беларусі за мінулыя дзяжурныя суткі (з 6:00 4 снежня да 6:00 5-га), вынікае з аператыўнай зводкі Міністэрства па надзвычайных сітуацыях.

Пажар у вёсцы Дубічна (Маларыцкі раён Брэсцкай вобласці) забраў жыццё мужчыны 1962 года нараджэння, у Талачыне (Віцебская вобласць) — жанчыны 1970 г.н., у Жлобіне (Гомельская вобласць) — мужчыны 1957 г.н.

З пачатку года ў краіне здарылася 5.784 пажары (за аналагічны перыяд 2023-га — 5.344; +8,2%), на якіх загінуў 501 чалавек (454; +10,4%), з іх дзяцей — 11 (7; +57 ,1%).

29 кастрычніка начальнік упраўлення па наглядзе за выкананнем заканадаўства аб непаўналетніх і моладзі Генеральнай пракуратуры Вікторыя Фіневіч паведаміла, што за студзень — верасень 2024 года “ад вонкавых прычын” загінула 94 дзіцяці (за аналагічны перыяд 2023-га — 73; +28,8%).

З 2021 года і да гэтай пары ад “вонкавых прычын” загінула 444 дзіцяці, з іх 37 — на пажарах, дадала чыноўніца.