Яшчэ два расійскія БПЛА ў ноч на 6 снежня паляцелі ў бок Беларусі — УСУ (дапоўнена)
Дададзеныя 3–5-ты абзацы.
6 снежня, Позірк. Два з 53 ударных беспілотных лятальных апаратаў (БПЛА), якімі Расія атакавала Украіну ў ноч на 6 снежня, паляцелі з кантраляванай Кіевам прасторы ў кірунку Беларусі, паведамляе камандаванне Паветраных сіл Узброеных сіл Украіны (УСУ).
Адзначаецца, што атака пачалася 5 снежня а 20:00. Да 7:00 6 снежня УСУ збілі 32 дроны, 16 былі “лакацыйна страчаныя”.
Паводле інфармацыі маніторынгавай групы “Беларускі Гаюн”, у ноч на 6 снежня ў паветраную прастору Беларусі ўварвалася не менш за 10 расійскіх БПЛА.
Пры гэтым падкрэсліваецца, што дроны “зноў заходзілі” ў Гомельскую вобласць “прама з Расіі” і “рухаліся ў кірунку Гомеля, Лоева і Мазыра”.
Авіяцыя ВПС Беларусі ў паветра не падымалася, гаворыцца ў паведамленні.
Раней украінскія Паветраныя сілы паведамлялі аб залёце на беларускую тэрыторыю расійскіх дронаў у ноч на 17, 18, 20, 22, 26, 27, 28 кастрычніка, 1, 3, 10, 11, 12, 13, 20, 22, 25, 26, 27 лістапада, 2 і 3 снежня.
4 кастрычніка Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок шмат збівае незалежна ад таго, украінскія яны ці расійскія.
Залёт БПЛА Лукашэнка патлумачыў недасведчанасцю аператараў, адзначыўшы, што пасля ўздзеяння сродкаў радыёэлектроннай барацьбы апараты губляюць арыенцір.
У ноч на 3 кастрычніка з’явілася інфармацыя пра ўварванне чарговага расійскага беспілотніка. Тады было выказана меркаванне, што дрон іранскай маркі “Шахед” мог упасці ў Калінкавічах (Гомельская вобласць). Беларускія ўлады інцыдэнт ніяк не каментавалі. Аднак на наступны дзень супрацоўнікі КДБ “пры сілавой падтрымцы вайскоўцаў САХРу” затрымалі жыхарку Калінкавічаў. Яны ўварваліся ў дом, відэакамера на якім зафіксавала шум і водбліскі беспілотніка, што падаў.
У ноч на 5 верасня некалькі дронаў былі збітыя над Гомелем, абломкі аднаго з іх упалі на будынак склада, ніхто не пацярпеў. Мінабароны прызнала факт парушэння мяжы лятучымі аб’ектамі, але не назвала, каму яны належалі.