У дачыненні да кіраўнікоў фондаў салідарнасці Стрыжака і Лявончыка распачатая спецвытворчасць (дапоўнена)

6 снежня, Позірк. Следчы камітэт 5 снежня распачаў спецыяльную вытворчасць у дачыненні да кіраўніка фонду салідарнасці BySol Андрэя Стрыжака і яго паплечніка, кіраўніка фонду By_Help Аляксея Лявончыка, паведамляе спецыялізаваны тэлеграм-канал ведамства.

Таксама спецвытворчасць распачатая ў дачыненні да пяці чалавек: ІТ-прадпрымальніка, аднаго са стваральнікаў лічбавай платформы “Новая Беларусь” Яраслава Ліхачэўскага, аднаго з заснавальнікаў BySol Аляксея Кузьмянкова, ІТ-прадпрымальніка, таксама звязанага з BySol, Аляксандра Падгорнага, кіраўніка Беларускага моладзевага хаба (Варшава) Аляксандра Лапко і актывісткі, былой сяброўкі палітвязня Эдуарда Бабарыкі, блогера Аляксандры Жук (Зверавай).

Усе сямёра абвінавачваюцца паводле ч. 1 і ч. 2 арт. 361¹, ч. 1 і 2 арт. 342, ч. 2 арт. 361², ч. 3 арт. 361, арт. 369, ч. 3 арт. 130, ч. 2 арт. 367, арт. 369¹, ч. 2 арт. 368, ч. 2 арт. 361⁴, арт. 370, ч. 2 арт. 361³, ч. 5 арт. 16 і ч. 1 арт. 356, ч. 2 арт. 290¹, ч. 1 арт. 289¹ Крымінальнага кодэкса.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.

Першыя спецвытворчасці былі адкрытыя 26 верасня 2022 года. У спісе асоб, падвергнутых гэтай працэдуры, на сайце СК налічваецца 129 чалавек.

Даведка “Позірку”:

арт. 16 Крымінальнага кодэкса — саўдзел у злачынстве;

арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 342 — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;

арт. 356 — здрада дзяржаве;

арт. 361 — заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

арт. 361¹ — стварэнне экстрэмісцкага фарміравання альбо ўдзел у ім;

арт. 361² — фінансаванне экстрэмісцкай дзейнасці;

арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта;

арт. 368 — абраза прэзідэнта;

арт. 369 — абраза прадстаўніка ўлады;

арт. 369¹ — дыскрэдытацыя Рэспублікі Беларусь;

арт. 370 — здзек над дзяржаўнымі сімваламі;

арт. 290¹ — фінансаванне тэрарыстычнай дзейнасці;

арт. 289¹ — прапаганда тэрарызму.