Дагавор аб гарантыях бяспекі з Мінскам прадугледжвае ўзаемную абарону канстытуцыйнага ладу — Пуцін
6 снежня, Позірк. Падпісаны 6 снежня дагавор аб гарантыях бяспекі РФ і Беларусі “вызначае ўзаемныя саюзніцкія абавязкі па забеспячэнні абароны, аховы суверэнітэту, незалежнасці і канстытуцыйнага ладу” дзвюх краін, заявіў Уладзімір Пуцін на пасяджэнні Вышэйшага дзяржаўнага савета Саюзнай дзяржавы 6 снежня ў Мінску.
Паводле яго, гаворка вядзецца таксама пра “цэласнасць і недатыкальнасць тэрыторыі і знешняй мяжы Саюзнай дзяржавы, прычым з задзейнічаннем усіх наяўных сіл і сродкаў”.
Пуцін чарговы раз нагадаў, што “гаворка ў тым ліку ідзе пра расійскую тактычную ядзерную зброю”, размешчаную “паводле прапановы” Аляксандра Лукашэнкі на тэрыторыі Беларусі.
Ён зноў паўтарыў тэзіс пра магчымасць яе выкарыстання “ў абарончых мэтах у адказ на магчымую атаку з ужываннем зброі масавага знішчэння або пры адбіцці агрэсіі з ужываннем звычайнай зброі, але такой, што стварае крытычную пагрозу для суверэнітэту ці тэрытарыяльнай цэласнасці”.
На думку Лукашэнкі, новыя дакументы дазволяць “не дапусціць парушэння тэрытарыяльнай цэласнасці Беларусі і Расіі, захаваць суверэнітэт і незалежнасць, а галоўнае — сфармаваць гарантыі мірнага жыцця”.
Намер падпісаць згаданую дамову “надта ўзрушыў” Захад, мяркуе Лукашэнка.
Як заявіў дзяржаўным СМІ міністр замежных спраў Беларусі Максім Рыжанкоў, “першапачаткова была ідэя пра гарантыі бяспекі з боку Расіі адносна Беларусі”: “Але мы жывём у Саюзнай дзяржаве, і калі мы партнёры, надзейныя саюзнікі і браты, то гарантыі павінны быць узаемнымі”.
19 лістапада Пуцін падпісаў Асновы дзяржаўнай палітыкі ў галіне ядзернага стрымлівання, у якіх, сярод іншага, згадваецца Беларусь. У дакуменце пазначана, што Масква “пакідае за сабой права” выкарыстоўваць ядзерную зброю ў адказ на “выкарыстанне супраць яе і (ці) яе саюзнікаў ядзернай і (ці) іншай зброі масавага знішчэння, а таксама ў выпадку агрэсіі супраць Расійскай Федэрацыі і (ці) Рэспублікі Беларусь як удзельнікаў Саюзнай дзяржавы з выкарыстаннем звычайнай зброі, што стварае крытычную пагрозу іх суверэнітэту і (ці) тэрытарыяльнай цэласнасці”.
Пра тое, што адаптаваная да “новых рэалій” дзяржпалітыка Расіі “дапускае магчымасць выкарыстання ядзернай зброі ў адказ на агрэсію супраць Беларусі”, заявіў міністр абароны РФ Андрэй Белавусаў 23 кастрычніка ў Мінску на пасяджэнні сумеснай калегіі двух вайсковых ведамстваў.
27 жніўня 2020 года Пуцін у інтэрв’ю тэлеканалу “Россия” заявіў, што на просьбу Лукашэнкі ў РФ быў сфармаваны “пэўны рэзерв з супрацоўнікаў праваахоўных органаў» для аказання дапамогі беларускім сілавікам на выпадак, калі б яна спатрэбілася — пасля прэзідэнцкіх выбараў 9 жніўня ў краіне працягваліся масавыя пратэсты.
У апублікаваным 22 кастрычніка гэтага года інтэрв’ю “РИА Новости” амбасадар РФ у Беларусі Барыс Грызлоў заявіў, што Расія “ў межах сваіх абавязацельстваў” акажа Мінску “дапамогу і падтрымку” ў выпадку “спроб дэстабілізацыі сітуацыі” падчас прэзідэнцкіх выбараў 2025 года, калі пра гэта папросіць беларуская бок.
З 24 лютага 2022 года Масква пры падтрымцы Мінска вядзе поўнамаштабную вайну супраць Украіны.