Фландрыя выдзяляе 100 тыс. еўра на падтрымку беларускіх журналістаў у выгнанні

13 снежня, Позірк. Фландрыя выдзяляе 100 тыс. еўра на падтрымку беларускіх журналістаў у выгнанні, паведамляе Belga News Agency са спасылкай на міністра-прэзідэнта гэтага рэгіёна Бельгіі Маціяса Дыпэндаэле.

Адзначаецца, што Фландрыя ўнясе ўнёсак у праграму дзеянняў Савета Еўропы на 2024–2025 гады, якая прадугледжвае “навучанне і аператыўную падтрымку журналістаў у выгнанні”. Такім чынам рэгіён “умацоўвае незалежныя СМІ, якія з’яўляюцца незаменнай апорай дэмакратыі”, гаворыцца ў паведамленні.

“Свабодныя і незалежныя СМІ жыццёва важныя для абароны дэмакратычных каштоўнасцяў. Дзякуючы гэтай падтрымцы Фландрыя дапамагае журналістам, якія, знаходзячыся пад велізарным ціскам, працягваюць працаваць над аб’ектыўным і надзейным асвятленнем падзей”, — заявіў Дыпэндаэле.

Паведамляецца, што ён сустрэўся з беларускім дэмакратычным лідарам Святланай Ціханоўскай у Брусэлі ў рамках Дзён Беларусі — еўрапейскай ініцыятывы, накіраванай на прыцягненне ўвагі да дэмакратычных рухаў і правоў чалавека ў Беларусі.

У кааліцыйным пагадненні ўрада Фландрыі сярод прыярытэтаў пазначаная падтрымка дэмакратычных сіл Беларусі, паведаміў Аб’яднаны пераходны кабінет 29 кастрычніка па выніках сустрэчы яго намеснік старшыні Паўла Латушка з генеральным прадстаўніком найбуйнейшага рэгіёну Бельгіі ў Польшчы Маціясам дэ Моорам.

12 снежня паведамлялася, што Еўрапейскі саюз выдзеліць 30 млн еўра для падтрымкі беларускага дэмакратычнага руху.