Супрацоўнікі ДАІ ў Капыльскім раёне стрэлам у кола спынілі аўтамабіль з нецвярозым кіроўцам

18 снежня, Позірк. У аграгарадку Быстрыца Капыльскага раёна (Мінская вобласць) супрацоўнікі Дзяржаўтаінспекцыі з выкарыстаннем агнястрэльнай зброі спынілі аўтамабіль з нецвярозым кіроўцам, паведамляе прэс-служба Міністэрства ўнутраных спраў.

Інцыдэнт адбыўся вечарам 17 снежня. Адзначаецца, што аўтамабіль “Опель” быў спынены стрэлам у кола, за рулём знаходзілася 31-гадовая жыхарка райцэнтра.

“Медыцынскае асведчанне паказала амаль 2 праміле алкаголю. Устаноўлена, што жанчына не мае пасведчання кіроўцы (не атрымлівала),” — гаворыцца ў паведамленні.

Падкрэсліваецца, што пра нецвярозага кіроўцу паведаміў у міліцыю мясцовы жыхар.

“Супрацоўнікі ДАІ аператыўна выявілі названы аўтамабіль і падалі сігнал спыніцца. Кіроўца праігнараваў яго, павялічыў хуткасць і спрабаваў ўцячы. Пачалася пагоня. Пры выездзе за межы населенага пункта для спынення транспартнага сродку інспектары выкарысталі табельную зброю,” — адзначылі ў МУС.

На жанчыну складзена сем адміністрацыйных пратаколаў, у тым ліку за непадпарадкаванне супрацоўнікам МУС. Яна затрыманая, аўтамабіль змешчаны на ахоўную стаянку.

Кіраванне транспартным сродкам у стане алкагольнага ап’янення цягне за сабой розныя меры адміністрацыйнага пакарання ў залежнасці ад канцэнтрацыі алкаголю ў крыві або ў выдыханым паветры: ад 0,3 да 0,8 праміле — штраф у памеры 100 базавых велічынь (4.000 рублёў) з пазбаўленнем права кіравання на тры гады; больш за 0,8 праміле — штраф у памеры 200 (8.000) базавых велічынь з пазбаўленнем права кіравання на пяць гадоў. За падобнае паўторнае парушэнне цягам года пасля накладання адміністрацыйнага пакарання прадугледжваецца крымінальная адказнасць.