На месцы пажару ГЦ у Віцебску ёсць прыкметы кароткага замыкання — старшыня ДКСЭ

19 снежня, Позірк. Згодна вынікаў агляду месца пажару ў віцебскім гандлёвым цэнтры “Беларусь” зафіксаваныя “непраектныя змены, якія ўнесеныя ў электраправодку”, заявіў старшыня Дзяржаўнага камітэта судовых экспертыз Аляксей Волкаў у эфіры тэлеканала АНТ 18 снежня.

“Ёсць прыкметы працы электрычных сетак у аварыйным рэжыме. Калі казаць простымі словамі — гэта кароткае замыканне”, — сказаў ён.

“Усё, што тычыцца Віцебска, гэтага ўласніка — з сённяшняга дня вядзецца пазапланавая праверка ўсіх яго аб’ектаў”, — паведаміў міністр па надзвычайных сітуацыях Вадзім Сіняўскі.

Паводле яго слоў, МНС праверыць усе 1,4 тыс. гандлёва-забаўляльных цэнтраў з масавым знаходжаннем людзей: “14 цэнтраў у нас выклікаюць сур’ёзную заклапочанасць, мы на ўсе гэтыя аб’екты з сённяшняга дня ўжо заходзім і будзем вырашаць пытанні, звязаныя з іх дадатковым маніторынгам”.

Ведамства таксама будзе “настойваць на ўрэгуляванні пытання, звязанага з абавязковымі патрабаваннямі па абслугоўванні энергаўстановак”: “Яны з’яўляюцца неабавязковымі, і за гэта ўласнік аб’екта не нясе ніякай адказнасці. Гэта дрэнна. Гэта трэба паправіць”.

Паводле старшыні Віцебскага аблвыканкама Аляксандра Субоціна, пасля інцыдэнту ў рэгіёне пачалася праверка месцаў масавага збору людзей.

Увечары 13 снежня ў ГЦ “Беларусь” здарыўся пажар, ахопленая агнём плошча дасягнула 2 тыс. квадратных метраў. 90 ратавальнікам спатрэбілася больш за чатыры гадзіны і 21 адзінка тэхнікі, каб здолець здарэнне. З будынка было эвакуявана звыш 200 чалавек.

14 снежня Следчы камітэт паведаміў аб узбуджэнні крымінальнай справы па факце пажару па ч. 2 арт. 304 КК (парушэнне патрабаванняў пажарнай бяспекі, якое пацягнула па неасцярожнасці прычыненне шкоды ў буйным памеры).

Міністэрства аховы здароўя паведамляла, што на 15 снежня налічвалася 20 пацярпелых, з якіх 16 шпіталізаваныя ў дзень пажару, чатыры чалавекі звярнуліся пасля па псіхалагічную дапамогу.

Адна жанчына знаходзіцца ў аддзяленні рэанімацыі ў цяжкім стане, яна была падключаная да апарата штучнай вентыляцыі лёгкіх — сярод дзевяці пацярпелых, паводле звестак на 18 снежня, якія застаюцца ў бальніцы.

16 снежня стала вядома пра затрыманне падазраваных у парушэнні патрабаванняў пажарнай бяспекі ў ГЦ “Беларусь”. Пасля нарады на тэму пажару ў кіраўніка адміністрацыі Аляксандра Лукашэнкі Дзмітрыя Крутога міністр унутраных спраў Іван Кубракоў наведаў падазраваных у Першамайскім РАУС Віцебска.

Паводле неафіцыйнай інфармацыі, сярод затрыманых можа быць Віктар Велюга, заснавальнік і дырэктар ПГУП “МегаЕвротекс”, у актывы якога ўваходзіць ГЦ.