Мінфін плануе даразмясціць да вясны дзяржаблігацыі на 15 млн долараў

19 снежня, Позірк. Аб правядзенні 18 снежня аўкцыёну па размяшчэнні дзяржаўных аблігацый, намінаваных у доларах ЗША, выпуску № 329 паведамляе Міністэрства фінансаў.

Паводле даных ведамства, у таргах удзельнічала 17 заявак ад юрыдычных і фізічных асоб са стаўкамі ад 2,5 да 4% гадавых. Іх агульная сума склала 9,743 млн долараў. “Па выніках аўкцыёну задаволеныя заяўкі на суму 5,025 млн долараў”, — адзначае Мінфін.

Ведамства прыняло рашэнне ўстанавіць: аб’ём выпуску — 20 млн долараў; стаўку працэнтнага даходу — 2,75% гадавых.

Неразмешчаная рэшта дзяржаблігацый выпуску № 329 складае 14,975 млн долараў. Яе плануецца даразмясціць з 23 па 30 снежня гэтага года і з 8 студзеня па 27 лютага 2025-га на пляцоўцы Беларускай валютна-фондавай біржы шляхам адкрытага продажу без правядзення аўкцыёну.

Рэспубліканскім бюджэтам на 2025 год прадугледжана выдаткаваць каля 10 млрд рублёў для пагашэння дзярждоўгу, яшчэ каля 5 млрд пойдзе на яго абслугоўванне. Пра гэта паведаміў міністр фінансаў Юрый Селіверстаў 10 лістапада ў эфіры тэлеканала “Беларусь 1”.

Паводле яго слоў, урад будзе працаваць над рэфінансаваннем дзяржаўнай запазычанасці і плануе для гэтых мэтаў прыцягнуць блізу 300 млн долараў (у валютным эквіваленце) на ўнутраным рынку, што “будзе выцягваць вялікі аб’ём рэсурсаў з эканомікі”.

“Але не трэба забываць, што частка гэтага доўгу — гэта тое, што мы пераўступалі, фінансавалі асобныя праекты, напрыклад атамную станцыю, і гэтыя сродкі нам будуць вяртацца ад рэальнага сектара. І не менш за паўмільярда долараў мы чакаем, што прыйдзе ад вяртання па тых праектах, якія былі рэалізаваны раней”, — заявіў кіраўнік Мінфіна.

“Планавыя лічбы па прыцягненні, якія маюцца па раней дасягнутых пагадненнях з расійскімі партнёрамі, — гэта таксама каля 1 млрд беларускіх рублёў у эквіваленце”, — адзначыў чыноўнік.