Чарнавік новай праграмы сацыяльна-эканамічнага развіцця мяркуе “тэхналагічны рывок” і “інвестыцыйны манеўр”

20 снежня, Позірк. Канцэпцыя праекта праграмы сацыяльна-эканамічнага развіцця на 2026–2030 гады павінна быць унесена ва ўрад у сакавіку наступнага года, паведамляе Мінэканомікі па выніках серыі працоўных сустрэч з дзяржорганамі па яго ўзгадненні.

У якасці прыярытэтаў дакумента названы пяць: “тэхналагічны рывок” (забеспячэнне суверэнітэту ў крытычна важных вытворчасцях на базе тэхналогій “Індустрыя 4.0” і штучнага інтэлекту), “інвестыцыйны манеўр” (прыярытэт інвесціравання ў праекты з высокім мультыплікатыўным эфектам), “кадры будучыні фарміраванне кадравага патэнцыялу пад патрэбнасці лічбавай эканомікі), “праактыўны экспарт” (інтэнсіўнае гандлёва-эканамічнае супрацоўніцтва з краінамі Паўднёва-Усходняй Азіі, Блізкага Усходу, Афрыкі і Лацінскай Амерыкі), “рэгіёны для чалавека” (стварэнне экалагічна бяспечных і развітых рэгіёнаў з высокімі стандартамі якасці жыцця).

Іншыя падрабязнасці праекту дакумента на дадзены момант не прыводзяцца.

Праграмы сацыяльна-эканамічнага развіцця на пяцігадовы перыяд традыцыйна фармальна зацвярджае Усебеларускі народны сход. З 2022 года гэта яго канстытуцыйнае паўнамоцтва.

Аднак канчаткова дакументы зацвярджаюцца ўказамі Аляксандра Лукашэнка.

Праграма на 2021–2025 гады зацверджана ўказам 29 ліпеня 2021 года № 292, 23 чэрвеня 2023 года ў яе ўнесены змяненні.

Прыярытэтамі ў дакуменце названы: “шчаслівая сям’я” (умацаванне традыцыйных сямейных каштоўнасцей, заснаваных на фізічным і духоўным дабрабыце чалавека, выхаванні дзяцей і моладзі, клопаце аб старэйшым пакаленні), “моцныя рэгіёны” (камфортныя і бяспечныя ўмовы жыцця і працы, развітая сацыяльная інфраструктура , высокая мабільнасць, інвестыцыі ў новыя эфектыўныя вытворчасці), “інтэлектуальная краіна” (якасная і даступная адукацыя, раскрыццё асобаснага патэнцыялу, развіццё навукі), “дзяржава-партнёр” (умацаванне дыялогу і ўзаемнага даверу паміж дзяржавай і грамадствам, дзяржавай і чалавекам, дзяржавай і бізнесам).

Сярод іншага праграма прадпісвае забяспечыць “паступальны рост ВУП — не менш як у 1,2 раза ў рэальным выражэнні ў 2025 годзе да ўзроўню 2020 года”.

Згодна з важнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.

Пры гэтым дзейная праграма сацыяльна-эканамічнага развіцця прадугледжвае яго рост за гэты год на 5,4%.

За студзень — лістапад 2024 года ВУП вырас на 3,9%.

У 2023 годзе ВУП вырас на 3,9%, у 2022-м — знізіўся на 4,7%, у 2021-м эканоміка вырасла на 2,3%, у 2020-м — скарацілася на 0,9%.