Пяць банкаў паведамілі пра новаўвядзенні

23 снежня, Позірк. Пяць банкаў, якія працуюць у Беларусі, паведамілі аб змене асобных правілаў абслугоўвання і прадставілі новыя магчымасці для кліентаў, сведчыць праведзены “Позіркам” маніторынг іх актуальных прэс-рэлізаў.

“Белгазпрамбанк” абмежаваў максімальную суму выдачы наяўнай замежнай валюты і беларускіх рублёў па аперацыях з выкарыстаннем картак банкаў-нерэзідэнтаў — 200 долараў у эквіваленце на працягу каляндарнага месяца.

“БНБ-Банк” з 23 па 31 снежня будзе спаганяць камісію ў памеры 2% за залічэнне пераводаў на рахункі кліентаў у еўра, калі такія пераводы паступілі праз карэспандэнцкія рахункі банка, адкрытыя ў “Белгазпрамбанку”, “Беларусбанку” і “Парытэтбанку”. Камісія будзе спаганяцца ад агульнай сумы залічаных сродкаў на рахунак на працягу каляндарнага дня, калі яна перавышае 10 тыс. еўра.

“БСБ Банк” прапануе ўсім жадаючым сэрвіс “Мой Курс”. Як указана на сайце фінансава-крэдытнай установы, гэта — “першы персанальны памочнік для браніравання індывідуальнага курсу для фізічных асоб”. Каб атрымаць паслугу, неабходна запусціць сэрвіс у месенджары “Телеграм” @mycourse_bsb_bot, пазначыць жаданую суму здзелкі. Пасля гэтага банк прапануе індывідуальны курс, які пры фіксацыі заказчыкам будзе актуальным на працягу 1 гадзіны. Абмен можна будзе зрабіць у любым даступным аддзяленні.

“МТБанк” змяніў да 1 лютага 2025 года ўмовы здзяйснення аплаты паслуг ва ўласных інфакіёсках і касах. У першых можна будзе аплаціць паслугі толькі з выкарыстаннем карты. Калі ў кліента ёсць наяўныя, іх прыйдзецца спачатку ўнесці на карту. Пасля гэтага здзейсніць плацёж ужо па карце ў адпаведнай галінцы АРІП у інфакіёску. У касе банка аплаціць паслугі можна з выкарыстаннем наяўных толькі па прад’яўленні дакумента, які сведчыць асобу.

“Парытэтбанк” устанавіў ліміт па аперацыях зняцця наяўных грашовых сродкаў ва ўласных банкаматах з картак банкаў-нерэзідэнтаў у памеры да 25 базавых велічынь (тысяча рублёў на сёння, 1.050 — з 1 студзеня) на працягу аднаго каляндарнага месяца.

На 1 лістапада 2024 года ў краіне зарэгістравана 22 банкі (адзін з іх — “Дэльта Банк” — знаходзіцца ў стадыі банкруцтва).

Прыбытак банкаў на 1 кастрычніка 2024 года склаў 2 млрд 842,3 млн рублёў — на 32% больш, чым на аналагічную дату 2023-га (2 млрд 152,6 млн), сведчыць праведзены “Позіркам” аналіз звестак Нацыянальнага банка.

Нарматыўны капітал павялічыўся на 14,3% (з 19 млрд 196,8 млн да 21 млрд 944,4 млн рублёў), актывы, дастатковасць нарматыўнага капіталу — на 1,4 п.п. (з 19,3% да 20,7%), актывы, схільныя да крэдытнай рызыкі, — на 14,4% (з 91 млрд 910,8 млн да 105 млрд 170,8 млн).