У 2024 годзе крымінальныя справы ў парадку спецвытворчасці распачатыя ў дачыненні да 110 беларусаў — “Вясна“

26 снежня, Позірк. Крымінальныя справы ў парадку спецыяльнай вытворчасці ў 2024 годзе распачатыя ў дачыненні да 110 грамадзян Беларусі, якія з’ехалі з краіны праз рэпрэсіі, паведамляе праваабарончы цэнтр “Вясна“.

Для параўнання праваабаронцы прывялі наступныя лічбы: за чатыры месяцы 2022 года было заведзена 17 завочных крымінальных спраў, за 2023 год — 18.

Перад чарговымі выбарамі, як адзначаецца, людзі ўнутры краіны “зазнаюць неймаверны ціск і пераслед: затрыманні і вобшукі не спыняюцца ўжо пяты год“. Праз палітычны пераслед усё больш людзей вымушана пакідаць дамы і з’язджаць з Беларусі, “аднак і гэтага рэжыму недастаткова“, падкрэслівае “Вясна“. 

“У 2024 годзе на вымушаных уцекачоў чыніцца ўсё больш моцны ціск: канвеер завочных судоў, вобшукі ў сваякоў, якія засталіся ў Беларусі, новыя пагрозы і абмежаванні — далёка не поўны спіс рэпрэсіўных практык, якія ўлады выкарыстоўваюць супраць іх“, — адзначаюць праваабаронцы.

У “спісе экстрэмістаў“, нагадалі яны, цяпер амаль 5.000 чалавек, у “тэрарыстычным“ — 1.220, сярод якіх больш за 500 — грамадзяне Беларусі. Акрамя таго, за шэсць месяцаў у расійскай базе вышуку апынулася 773 беларуса, у тым ліку праваабаронцы і журналісты; агулам у ёй больш за 3.500 чалавек.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.