Беларусь заняла сёмае месца на тэрыторыі былога СССР па росце спажывецкіх цэн у студзені — лістападзе 2024 года
26 снежня, Позірк. Беларусь з паказчыкам 4,57% заняла сёмае месца па росце спажывецкіх цэн у студзені-лістападзе 2024 года на тэрыторыі былога СССР, сведчыць праведзены “Позіркам” аналіз даных нацыянальных органаў статыстыкі.
Наперадзе па інфляцыі за 11 месяцаў Украіна (+10,4%), Узбекістан (+8,67%), Расія (+8,09%), Казахстан (+7,6%), Малдова (+5,9%) і Кыргызстан (+5,4%).
За Беларуссю — Азербайджан (+3,9%), Эстонія (+3,8%), Таджыкістан (+3,4%), Латвія (+3%), Літва (+1,8%), Грузія (+1,2%) і Арменія (+0,4%).
Туркменістан шэсць гадоў не публікуе звесткі пра інфляцыю.
У 2023 годзе спажывецкія цэны ў Беларусі выраслі на 5,84% (пятае месца на тэрыторыі былога СССР), у 2022-м — на 12,83% (дзявятае), 2021-м — на 9,97% (таксама дзявятае), 2020-м — на 7,36% (пятае), 2019-м — на 4,73% (шостае), за апошнія пяць гадоў — на 47,66%, з улікам студзеня — лістапада 2024 года — на 54,41%.