Паводле звестак Генпракуратуры, за апошнія 10 гадоў злачыннасць непаўналетніх скарацілася ўдвая

26 снежня, Позірк. У два разы за апошнія 10 гадоў скараціўся ўзровень злачыннасці сярод непаўналетніх, паведамляе Генеральная пракуратура.

Адзначаецца таксама, што за апошнія пяць гадоў колькасць злачынстваў, учыненых непаўналетнімі, зменшылася на 25%.

На думку Генпракуратуры, гэта адбылося “з прычыны належнай каардынацыі пракурорамі дзейнасці дзяржаўных органаў“.

Паводле звестак МУС, за 10 гадоў колькасць непаўналетніх, уцягнутых у незаконны абарот наркотыкаў, зменшылася ў пяць разоў, з 371 да 66. Разам з тым ва ўсіх рэгіёнах МУС адзначае рост колькасці нарказлачынстваў, учыненых непаўналетнімі.

У Мінску ў першай палове 2024 года зафіксавана зніжэнне колькасці злачынстваў на 10,7%, аднак падлеткавая злачыннасць павялічылася на 36,8%, больш чым у тры разы вырасла колькасць злачынстваў непаўналетніх, звязаных з незаконным абаротам наркатычных сродкаў з мэтай збыту, паведаміў у ліпені пракурор сталіцы Алег Лаўрухін на пасяджэнні калегіі гарадской пракуратуры.

У 2023 годзе ў суды перададзеныя крымінальныя справы 727 непаўналетніх грамадзян, асуджана 692, з іх на пазбаўленне волі асуджана 140.

Паводле звестак Следчага камітэта, найбольш распаўсюджаным відам злачынстваў, якія здзяйсняюцца непаўналетнімі, з’яўляюцца крадзяжы (46%), хуліганства (20%) і незаконны абарот наркотыкаў (9%).

У дакладзе вярхоўнага камісара ААН па правах чалавека, прадстаўленым 20 сакавіка, гаворыцца, што па стане на 31 снежня 2023 года 50 непаўналетніх юнакоў і 5 дзяўчат былі асуджаныя ў рамках крымінальных спраў па палітычна матываваных абвінавачваннях. Пры гэтым, як адзначана ў дакуменце, дзецям, якія не дасягнулі ўзросту крымінальнай адказнасці, прад’яўляліся крымінальныя абвінавачванні, некаторых дапытвалі без адваката або бацькоў, а ў некалькіх выпадках не разглядаліся альтэрнатывы дасудоваму зняволенню і пазбаўленню волі.