Перад выбарамі сілавікам загадана “адпрацаваць пратэстных грамадзян”, сцвярджае ByPol
28 снежня, Позірк. Напярэдадні прэзідэнцкіх выбараў 2025 года супрацоўнікі міліцыі атрымалі спісы грамадзян, якія ўдзельнічалі ў пратэстах 2020-га — для “адпрацоўкі і правядзення прафілактычных мерапрыемстваў”, сцвярджае аб’яднанне былых сілавікоў ByPol са спасылкай на ўласную крыніцу.
Адзначаецца, што спісы складзеныя на аснове даных з “так званай базы “Беспарадкі”. Працэс “адпрацоўкі”, як заяўлена, курыруе не МУС, а галоўнае ўпраўленне абароны канстытуцыйнага ладу і барацьбы з тэрарызмам КДБ.
Паводле інфармацыі арганізацыі, перад сілавымі структурамі стаіць задача “не дапусціць акцый пратэсту, накшталт тых, якія пачаліся падчас папярэдніх “выбараў” 2020 года”.
“Наша крыніца патлумачыла, што да “выбараў”, што прызначаны на канец студзеня 2025 года, усе “абавязкі па прызначэнні”, за якія звычайна адказваюць праваахоўнікі, адышлі на другі план. За іх вынікі ніхто не спаганяе, — заяўляе ByPol. — Галоўная задача на бліжэйшыя месяцы — адпрацоўка “пратэстных грамадзян”. Супрацоўнікі павінны ўпэўніцца, што гэтыя людзі не будуць браць удзел у пратэстах. Для гэтага, не выключана, асобных “нядобранадзейных” беларусаў напярэдадні “выбараў” могуць прыцягнуць да адміністрацыйнай або крымінальнай адказнасці, у тым ліку і на падставе надуманых або нязначных падстаў”.
Цяпер супрацоўнікі МУС, як сцвярджае аб’яднанне былых сілавікоў, “у рамках існых спраў аператыўнага ўліку праводзяць аператыўна-вышуковыя мерапрыемствы ў дачыненні да патэнцыйна “пратэстных” грамадзян”.
“Гэта, у прыватнасці, кантроль у сетках электрасувязі, вонкавае назіранне, навядзенне даведак і аператыўныя апытанні. Бліжэй да саміх “выбараў” найбольш актыўных пратэстоўцаў плануецца затрымліваць пад любымі падставамі”, — гаворыцца ў паведамленні.
Разам з тым, адзначае арганізацыя, спасылаючыся на даныя крыніцы, “сілавікі ўпэўненыя, што пратэстаў, хутчэй за ўсё, не будзе, а таму ставяцца да абавязкаў па адпрацоўцы несур’ёзна, абы як”.
“З большага проста робяць выгляд, што “адпрацоўваюць”. Хаця, не выключана, што напярэдадні “выбараў” рэпрэсіі супраць “нядобранадзейных” беларусаў узмоцняцца”, — заяўляе ByPol.
Сёмыя прэзідэнцкія выбары адбудуцца 26 студзеня 2025 года.
Кампанія праходзіць пад поўным кантролем улад. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі.
Папярэднія прэзідэнцкія выбары 9 жніўня 2020 года адзначыліся самымі маштабнымі і працяглымі пратэстамі за ўсю гісторыю суверэннай Беларусі. Масавыя палітычныя рэпрэсіі, якія пачаліся пасля выбараў, цягнуцца дагэтуль.
З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.