У Расіі затрыманая партыя кантрабандных беларускіх цыгарэт на 211 тыс. долараў

29 снежня, Позірк. Партыя кантрабандных цыгарэт беларускай вытворчасці затрыманая ў Бранскай вобласці, паведамляе мытная служба гэтага расійскага рэгіёну.

Адзначаецца, што ў Краснагорскім раёне супрацоўнікі мабільнай групы мытні спынілі грузавы аўтамабіль пад кіраваннем 54-гадовага грамадзяніна Беларусі.

“Па дакументах ён перавозіў адсеў друзу з Гомеля ў Бранск, але пры аглядзе пад адсевам выявілі 359 скрынак з цыгарэтамі. Усяго канфіскавана 173 тыс. пачкаў цыгарэт Карона Kalisto Super Slim”, — гаворыцца ў паведамленні.

Кошт затрыманага грузу ацэньваецца ў 22,3 млн расійскіх рублёў (каля 211,4 тыс. долараў).

“Распачатая крымінальная справа за кантрабанду. Мужчыну пагражае да пяці гадоў пазбаўлення волі або штраф ад 300 тыс. да мільёна [расійскіх] рублёў”, — падкрэслілі ў ведамстве.