Больш за 1,7 тыс. чалавек асуджана ў 2024 годзе па палітычна матываваных крымінальных справах — “Вясна”

30 снежня, Позірк. Не менш за 1.721 чалавек асуджаны ў Беларусі па палітычна матываваных крымінальных справах у 2024 годзе, паведамляе праваабарончы цэнтр “Вясна“.

Праваабаронцам вядома пра 1.241 асуджанага мужчыну (72,1%) і 480 жанчын (27,9%).

21 чалавек — пенсійнага ўзросту (14 жанчын і 7 мужчын), 144 пераследавалася ў парадку спецвытворчасці.

Самым распаўсюджаным відам пакарання па такіх крымінальных справах з’яўляецца пазбаўленне волі: да калоніі і турмы ўсіх відаў рэжымаў сёлета прыгаворана 55,4% рэпрэсаваных, да абмежавання волі з накіраваннем у папраўчую ўстанову адкрытага тыпу — 4,3 %, без накіравання — 38,7%, арыштавана 0,6%, аштрафавана 0,3%, прымусовае лячэнне прызначана 0,7%.

Паводле даных праваабаронцаў, больш за ўсё “палітычных” працэсаў па крымінальных справах праведзена ў Мінску (51,4%) і Брэсцкай вобласці (18%). Менш за ўсё — у Магілёўскай (4,8%) і Віцебскай абласцях (3%).

Паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) за год асуджана 1.019 чалавек, арт. 368 (абраза прэзідэнта) — 245, арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) — 186, арт. 369 (абраза прадстаўніка ўлады) — 135, арт. 3614 (садзейнічанне экстрэмісцкай дзейнасці) — 109 чалавек, арт. 361 (заклікі да мер абмежавальнага характару (санкцыям), іншым дзеянням, накіраваным на прычыненне шкоды нацыянальнай бяспецы Рэспублікі Беларусь) — 75.

За атрыманне прадуктовых перадач пры дапамозе ініцыятывы IneedHelpBY (прызнаная “экстрэмісцкім фарміраваннем”) праз ператрусы, допыты і затрыманні прайшлі як мінімум 287 чалавек.

У статыстычным аглядзе “Вясны” за 2024 год, апублікаваным 29 снежня, паведамлялася, што ў Беларусі не менш за 224 чалавекі “знаходзяцца за кратамі ў асаблівай рызыцы”. 104 палітвязняў маюць “цяжкі стан фізічнага здароўя”, 11 — інваліднасць, 16 — ментальныя разлады.

46 палітвязняў старэйшыя за 60 гадоў, 29 з’яўляюцца шматдзетнымі бацькамі.

У няволі ўтрымліваецца 175 культурных дзеячаў, 45 прадстаўнікоў СМІ, больш за 30 ІТ-спецыялістаў, 20 вайскоўцаў, 17 лекараў, 10 святароў і вернікаў, сем адвакатаў, шэсць праваабаронцаў.