З 1 студзеня настаўнікам павялічаць заробкі — для “падвышэння прэстыжу педагагічнай прафесіі”

31 снежня, Позірк. Для “падвышэння прэстыжу педагагічнай прафесіі” і ў рамках “паслядоўнага падвышэння памеру аплаты працы педагагічных работнікаў” 1 студзеня 2025 года плануецца павялічыць зарплату настаўнікаў і выхавацеляў, паведамляе прэс-служба Міністэрства адукацыі.

Як паведамляў “Позірк”, паводле даных Нацыянальнага статыстычнага камітэта, самы нізкі намінальны налічаны заробак у лістападзе быў менавіта ў прадстаўнікоў сістэмы адукацыі — 1.593,1 рубля. Сярэдні паказчык па ўсіх галінах эканомікі ў тым месяцы быў 2.331,8 рубля.

Паводле інфармацыі Мінадукацыі, заробкі настаўнікаў вырастуць на 39%, выхавацеляў і памочнікаў выхавацеляў ва ўстановах дашкольнай адукацыі — на 20%. Выкладчыкам, майстрам вытворчага навучання заробак падвысяць на 27%.

“З мэтай прыцягнення” навуковых работнікаў да педагагічнай дзейнасці і “падвышэння якасці падрыхтоўкі студэнтаў” на 15% павялічваецца заробак прафесарска-выкладчыцкага складу; усталёўваецца надбаўка за навукова-педагагічную дзейнасць кіраўнікам і спецыялістам з ліку прафесарска-выкладчыцкага складу, якія маюць навуковую ступень кандыдата навук — 35% акладу, доктара навук — 55% акладу.

Пастанова таксама прадугледжвае 20-працэнтны рост аплаты працы сацыяльных педагогаў, педагогаў-псіхолагаў, што, як мяркуюць у Мінадукацыі, “падкрэслівае важную ролю сумеснай працы ўстановы адукацыі і сям’і ў выхаванні дзяцей”.

Павялічыцца “памер дыяпазону даплаты за асаблівыя ўмовы працы” — у сярэднім на 10% базавай стаўкі — за працу з дзецьмі, якія маюць асаблівасці псіхафізічнага развіцця, разлады аўтыстычнага спектру, невідушчымі, дзецьмі-сіротамі і дзецьмі, якія засталіся без апекі бацькоў, з ліку асоб з асаблівасцямі псіхафізічнага развіцця.

Падвышэнне заробкаў педагагічнага складу ў 2025 годзе адбудзецца напярэдадні прэзідэнцкіх выбараў, прызначаных на 26 студзеня.

1 студзеня 2024 года заробкі педагогаў таксама выраслі, аднак не так значна: настаўнікаў устаноў агульнай сярэдняй і спецыяльнай адукацыі — на 22%, кіраўнікоў з ліку педагагічных работнікаў, настаўнікаў дзіцячых школ мастацтваў, настаўнікаў-дэфектолагаў, выхавальнікаў груп падоўжанага дня і работнікаў іншых катэгорый — на 15% акладу.

Выхавацелям ва ўстановах дашкольнай адукацыі, “якія ажыццяўляюць персанальнае суправаджэнне навучэнцаў з разладамі аўтыстычнага спектру”, заробкі павысілі на 30% базавай стаўкі, памочнікам выхавацеля “пры аказанні дапамогі ў суправаджэнні навучэнцаў з парушэннямі функцый апорна-рухальнага апарата з выяўленымі парушэннямі перамяшчэння, таксама навучэнцаў з парушэннямі маўлення, з цяжкасцямі ў навучанні, што маюць парушэнні паводзін” — на 20%.

Акрамя таго, на 5% акладу быў падвышаны заробак кіраўнікоў і спецыялістаў з ліку прафесарска-выкладчыцкага складу.

Аналітыкі iSANS у лістападаўскім дакладзе, прысвечаным выкарыстанню ўладамі Беларусі рэсурсаў сістэмы адукацыі для арганізацыі і правядзення выбараў, адзначалі “значныя змены” ў гэтым працэсе з другой паловы 2022 года, а першыя значныя праявы гэтых змен адбыліся пры правядзенні Адзінага дня галасавання на пачатку 2024 года.

Старт выбарчай кампаніі 2025 года, як адзначалася ў дакуменце, паказаў, што ўлада “не толькі выкарыстоўвае сістэму адукацыі для вырашэння наяўных электаральных задач, але і фармуе перад ёй стратэгічныя мэты”.

Эксперты звярнулі ўвагу на праведзены ў сярэдзіне кастрычніка семінар для педагогаў, на якім кіраўнік ЦВК Ігар Карпенка заклікаў настаўнікаў “весці тлумачальную працу з дзецьмі на тэму выбараў, распавядаў пра недахопы выбарчага працэсу ў краінах Захаду і “адкрытасць” беларускай выбарчай сістэмы”.

У iSANS мяркуюць, што следствам уцягвання сістэмы адукацыі ў працэс правядзення выбарчых кампаній “стане сітуацыя, калі ўся працэдура арганізацыі і правядзення выбараў будзе цалкам кантралявацца ўладай”, да ўдзелу ў любым з этапаў гэтага працэсу “будзе дапускацца толькі абмежаванае кола людзей, што даказала сваю лаяльнасць уладзе”.

У 2020 годзе фальсіфікацыі вынікаў прэзідэнцкіх выбараў часта здараліся на ўчастках, размешчаных у школах, непасрэдны ўдзел у гэтым бралі настаўнікі і адміністрацыя. Аналагічная сітуацыя складвалася і раней, праз што частка беларускага грамадства абвінавачвала педагогаў у непасрэдным удзеле ў падтасоўцы вынікаў выбараў і саўдзеле ў фальсіфікацыях.