Мінспорту папрасіла актывізаваць здачу нормаў ГПА ў працоўных калектывах Брэсцкай вобласці — дакумент

Апублікавана на адкрытай версіі “Позірку” 31 снежня ў 18:58.

31 снежня, Позірк. Міністэрства спорту і турызму заклапацілася нізкім узроўнем здачы нарматываў комплексу ГПА жыхарамі Брэсцкай вобласці, вынікае са службовага ліста першага намесніка кіраўніка ведамства Аляксандра Дараховіча намесніку старшыні аблвыканкама Вадзіму Краўчуку.

Дакумент датаваны вераснем 2024 года, яго копію “Позірку” перадало аб’яднанне былых сілавікоў BelPol.

Звяртаючыся да Краўчука, Дараховіч падкрэслівае, што міністэрства рэалізуе “дзяржаўную палітыку ў сферы фізічнай культуры” і ў рамках гэтай дзейнасці праводзіць “мэтанакіраваную працу па ўключэнні грамадзян у рэгулярныя заняткі” фізкультурай і спортам, “прапагандзе здаровага ладу жыцця”.

“Адным з элементаў рэалізацыі дадзенай палітыкі” чыноўнік называе “правядзенне мерапрыемстваў па здачы нарматываў” ГПА.

“Паводле даных статыстыкі, насельніцтва Брэсцкай вобласці складае 1 млн 308 тыс. 569 жыхароў (лічбы Белстата на 1 студзеня 2024 года. — “Позірк“.), з іх у сістэматычныя заняткі фізічнай культурай і спортам ўцягнута 336 тыс. 832 чалавекі (25,7% ад агульнай колькасці жыхароў)”, — гаворыцца ў лісце.

Пры гэтым, як заяўляецца, на 1 верасня 2024 года нарматывы ГПА здалі 914 чалавек (0,07% жыхароў вобласці).

“Гэты паказчык з’яўляецца самым нізкім па рэспубліцы”, — адзначае Дараховіч.

“У сувязі з вышэйсказаным просім актывізаваць працу па здачы нарматываў комплексу ГПА ў працоўных калектывах прадпрыемстваў і арганізацый, у тым ліку з прыцягненнем навучэнцаў устаноў адукацыі”, — заяўляе намеснік кіраўніка ведамства.

Пра “канкрэтныя вынікі праведзенай працы” ён просіць праінфармаваць Мінспорту не пазней за 10 кастрычніка 2024 года.

Нормы першага Усесаюзнага комплексу ГПА (“Гатовы да працы і абароны”) былі зацверджаныя ў СССР 11 сакавіка 1931 года, дзейнічалі да 1991-га. У здачу нарматываў былі ўцягнутыя грамадзяне ва ўзросце ад 10 да 60 гадоў.

У комплекс выпрабаванняў уваходзілі бег, скачкі ў даўжыню, адцісканні, плаванне, кіданне вучэбнай гранаты і інш.

Беларускія ўлады ў апошнія гады спрабуюць адрадзіць масавую здачу ГПА насельніцтвам. Гэтая ж палітыка рэалізуецца ў Расіі.

9 ліпеня 2023 года начальнік аддзела фізічнай культуры Мінспорту Пётр Воран паведаміў пракрамлёўскаму агенцтву “Sputnik Беларусь”, што ў 2022 годзе спортам займалася 26,8% жыхароў краіны.

“Гэта больш за два мільёны чалавек, паказчык у параўнанні з 2020 годам значна павялічыўся сярод дзяцей і дарослых. У тым ліку гэта відаць і па нарматывах ГПА”, — удакладніў чыноўнік.

Паводле яго слоў, у 2022-м нарматывы ГПА выканалі больш за 10 тыс. чалавек, у 2021-м — 9.704.

Воран дапусціў, што ў будучыні ў беларускі комплекс ГПА могуць быць уключаныя “зборка-разборка аўтамата Калашнікава, кіданне гранаты і іншыя спецыфічныя нарматывы”.