Урачы, што з’ехалі з Беларусі, “просяцца назад”, сцвярджае Лукашэнка
31 снежня, Позірк. Неабходна стварыць усе ўмовы, каб беларускія медыкі “працавалі на роднай зямлі, а не бегалі па свеце ў пошуках лепшага жыцця”, заявіў Аляксандр Лукашэнка 31 снежня падчас наведвання Мінскай абласной дзіцячай клінічнай бальніцы.
Паабяцаўшы будаваць арэнднае жыллё для ўрачоў, спікер парадаваўся: “Некаторыя з вашых пабеглі, а цяпер (у мяне на стале стос матэрыялу і дакументаў) просяцца назад”.
“Я задаю пытанне: “Дык а чаму ж? Што ж вы? Там і заробак, і ўсё”. “Не, не, не. Такой аховы здароўя, як у Беларусі, няма. У комплексе, у цэлым”, — сцвярджае ён. Лукашэнка не ўдакладніў, з кім менавіта быў такі дыялог, калі ён сапраўды адбыўся.
На яго думку, беларускім адмыслоўцам цяжка рэалізаваць сябе за мяжой, нягледзячы на высокую кваліфікацыю.
“І дзіўна. Я думаў, што палякі — гэта нашы людзі, нашы родныя, славяне і іншае, ніколі нашых людзей не пакрыўдзяць. Але нічога падобнага: гэта палякі, а вы вось там усе — і ўкраінцы, і беларусы і гэтак далей. Але калі нехта хоча паспрабаваць — калі ласка. Не хацелася б, але глядзіце самі, вы робіце свой выбар”, — заявіў Лукашэнка.
Пасля 2020 года з рэпрэсіямі ў Беларусі сутыкнуліся ў тым ліку медыкі. Многія з іх актыўна ўдзельнічалі ў пратэстах, выступаючы супраць гвалту і катаванняў над людзьмі. Кіраўніцтва бальніц звальняла нелаяльных медыкаў, хаця сярод іх былі прадстаўнікі ўнікальных для Беларусі спецыялізацый.
У Рэспубліканскім банку вакансій на 23 снежня было 4.496 заявак на пошук урачоў-спецыялістаў, на 14 чэрвеня — 4.987, на 20 студзеня — 4.608, напрыканцы леташняга чэрвеня — 3.862.
У статыстычным аглядзе праваабарончага цэнтра “Вясна” за 2024 год, апублікаваным 29 снежня, гаворыцца пра 17 урачоў, якія знаходзяцца ў няволі ў Беларусі.
Дакладная колькасць медыкаў, якія пакінулі краіну або сышлі з прафесіі праз рэпрэсій, невядомая.
Да канца 2023 года сярэдні заробак урачоў у Беларусі дасягаў 3 тыс. рублёў брута, урач атрымліваў суму, эквівалентную на той момант 740 эўра. Пра гэта ў жніўні заявіў акадэмічны дырэктар даследчага цэнтра BEROC, доктар эканамічных навук Леў Львоўскі, прэзентуючы даследаванне “Пра стан сістэмы аховы здароўя Беларусі”.
Сярэдні заробак урача ў Польшчы пасля выплаты сярэдняга падатку — 3.137 еўра (на 131% вышэй за сярэдні па краіне), у Літве — 5.019 еўра (на 168%), у Германіі — 5.389 (на 144%), гаварылася ў даследаванні.
Пры гэтым у Польшчы толькі ў 2022 годзе было выдадзена каля тысячы дазволаў на працу для ўрачоў з Беларусі. Львоўскі спрагназаваў, што разрыў у аплаце працы ўрачоў у Беларусі і суседніх еўрапейскіх краінах будзе расці, а разам з ім і адток адмыслоўцаў.
Вынікі-2024. У беларускай медыцыне месца подзвігу ўсё менш
Апублікавана на адкрытай версіі "Позірку" 29 снежня 2024 года ў 12:00 На пачатку 2024 года ў Міністэрства аховы здароўя з'явіўся новы кіраўнік — нарколаг і псіхіятр Аляксандр Хаджаеў. Пры прызначэнні Аляксандр Лукашэнка даручыў яму пазбавіцца ад кланавасці, якая нібыта аблытала …