Вынікі-2024. ЗША працягнуць падтрымку дэмакратычных памкненняў беларускага народа

31 снежня, Позірк. Злучаныя Штаты Амерыкі застаюцца прыхільнымі падтрымцы дэмакратычных прынцыпаў і правоў чалавека ў Беларусі.

Пра гэта гаворыцца ў каментары амбасады ЗША ў Беларусі для “Позірку” ў адказ на просьбу ацаніць дынаміку беларуска-амерыканскіх адносін у 2024 годзе і іх перспектывы ў 2025 годзе.

Дыпламатычная місія адзначыла, што з задавальненнем успрыняла вызваленне больш за 200 палітычных зняволеных у апошнія месяцы, але працягне заклікаць улады вызваліць больш за 1.250 вязняў, якія несправядліва застаюцца за кратамі. “У 2025 годзе мы плануем працягнуць падтрымку дэмакратычных памкненняў беларускага народа“, — падкрэсліваецца ў каментары.

Амбасада адзначыла, што “на працягу ўсяго 2024 года Злучаныя Штаты працягвалі рашуча падтрымліваць народ Беларусі, звяртаючы асаблівую ўвагу на тое, каб яго голас быў пачуты, паколькі ён імкнецца рэалізаваць свае асноўныя правы і свабоды“. Сёлета ў снежні падчас другога раўнда стратэгічнага дыялогу паміж Злучанымі Штатамі і беларускім дэмакратычным рухам ЗША “з гонарам пацвердзілі сваю рашучую падтрымку беларускага народа ў яго імкненні да суверэннай, незалежнай і дэмакратычнай будучыні“.

Аляксандр Лукашэнка ў нядаўнім каментары тэлеканалу “Россия 1” падчас саміту Еўразійскага эканамічнага саюза (ЕАЭС) у Ленінградскай вобласці (РФ) заявіў, што Вашынгтон “ужо цэлы год” просіць улады Беларусі “павялічыць штаты ў амбасадзе“.

Паводле слоў Лукашэнкі, ЗША хочуць пашырыць дыппрадстаўніцтва ў Беларусі “да сотні чалавек“.

“У нас амерыканцаў практычна няма. <…> Але ж мы нікога не трымаем у Беларусі. Хочуць — няхай застаюцца ў нас, не — значыць, не. Але іх 0,2 чалавека”, — дадаў Лукашэнка, адказваючы на пытанне аб падаўжэнні ЗША рэкамендацыі сваім грамадзянам пакінуць Беларусь.

23 студзеня 2022 года, за месяц і адзін дзень да пачатку маштабнага ўварвання Расіі ва Украіну пры падтрымцы беларускіх уладаў, Злучаныя Штаты рэкамендавалі сваім грамадзянам устрымацца ад наведвання Беларусі. Ім нагадалі пра неабходнасць “павышанай увагі і пільнасці ў сувязі з палітычнай і ваеннай напружанасцю ў рэгіёне“.

Пазней рэкамендацыя пакінуць Беларусь некалькі разоў падаўжалася.

31 студзеня таго ж года Дзярждэпартамент ЗША распарадзіўся аб выездзе з Беларусі членаў сем’яў амерыканскіх дзяржслужачых. Дзярждэп не рэкамендаваў сваім грамадзянам наведваць Беларусь “з прычыны адвольнага характару прымянення законаў, рызыкі быць затрыманым, а таксама нетыповага і выклікаючага трывогу нарошчвання расійскай ваеннай моцы ўздоўж мяжы Беларусі з Украінай“.

Пасля падзей 2020 года многія дэмакратычныя дзяржавы знізілі дыпламатычную прысутнасць у Беларусі да ўзроўню часовага паверанага ў справах.

9 чэрвеня 2022 года пасаду спецыяльнага прадстаўніка ЗША па Беларусі пакінула Джулі Фішар. З 2020 года яна працавала ў Вільнюсе, паколькі МЗС Беларусі адклікаў згоду на яе прызначэнне амбасадарам у Мінску.

11 жніўня 2021 года прэс-сакратар беларускага знешнепалітычнага ведамства Анатоль Глаз заявіў, што “амерыканскаму боку прапанавана да 1 верасня скараціць колькасць сваёй амбасады ў Мінску да 5 чалавек“.

“На фоне дзеянняў Вашынгтона па скарачэнні супрацоўніцтва ва ўсіх сферах і эканамічным задушэнні нашай краіны мы не бачым сэнсу ў прысутнасці ў Беларусі такога значнага персаналу амерыканскай дыпмісіі. Проста незразумела, чым ім займацца на такім фоне“, — сказаў ён.

28 лютага 2022 года, праз чатыры дні пасля пачатку поўнамаштабнай вайны ва Украіне, Дзярждэп прыняў рашэнне аб прыпыненні дзейнасці амбасады ЗША ў Мінску “да далейшага паведамлення“.

У цяперашні час супрацоўнікі амбасады ЗША ў Беларусі, уключаючы часовага паверанага Пітэра Каўфмана, фізічна знаходзяцца ў Вільнюсе.

Сёлета ў кастрычніку Мінск наведаў чыноўнік Дзярждэпартамента ЗША Кевін Дойл.