Ціханоўская: Ніводнае дзіця не павінна пакутаваць праз тое, што яго бацькі мараць пра свабоду
2 студзеня, Позірк. Ніводнае дзіця не павінна пакутаваць “праз тое, што яго бацькі мараць пра свабоду”, заявіла 2 студзеня беларускі дэмакратычны лідар Святлана Ціханоўская.
“Аднак тысячы дзяцей у Беларусі разлучаныя са сваімі бацькамі праз палітычныя рэпрэсіі. Каманда нашага офіса далучылася да штогадовай ініцыятывы “Калядная пошта” фонду “Краіна для жыцця”, каб прынесці святло ў жыццё такіх дзяцей”, — напісала палітык на сваёй старонцы ў сацыяльнай сетцы Х.
Заява Ціханоўскай з’явілася на фоне прыняцця Саветам міністраў 30 снежня 2024 года пастановы № 1055 “Аб прызнанні дзяцей, якія знаходзяцца ў сацыяльна небяспечным становішчы і маюць патрэбу ў дзяржаўнай абароне”.
З дакумента, які набыў моц 1 студзеня 2025 года, вынікае, што дзеці, чые бацькі прыцягваліся да адказнасці за нелаяльнасць уладам, могуць надзяляцца статусам асоб у сацыяльна небяспечным становішчы (СНП).
Згодна з пастановай, паказчыкам СНП з’яўляецца выяўленне фактаў прыцягнення і (або) вызвалення ад адміністрацыйнай адказнасці за правапарушэнні паводле артыкулаў 19.1, 19.4, 19.10, 19.11, 25.11 Кодэкса аб адміністрацыйных правапарушэннях.
У дачыненні да грамадзян, якія карыстаюцца незалежнымі крыніцамі інфармацыі (улады лічаць іх кантэнт “экстрэмісцкімі матэрыяламі”), масава прымяняецца арт. 19.11 — “Распаўсюд, выраб, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці або якая прапагандуе такую дзейнасць”.
Арт. 19.4 (“Уцягванне непаўналетняга ў антыграмадскія паводзіны”) прадугледжвае адказнасць у тым ліку за “ўцягванне непаўналетняга ва ўдзел у сходзе, мітынгу, вулічным шэсці, дэманстрацыі, пікетаванні, іншым масавым мерапрыемстве, якія праводзяцца з парушэннем вызначанага парадку”. Цяпер у краіне дазволеная вулічная актыўнасць толькі праўладнага кшталту.
Арт. 19.1 (“Дробнае хуліганства”) — за такое правапарушэнне раней актыўна прыцягваліся да адказнасці грамадзяне, якія ўдзельнічалі ў вулічных акцыях, ім ставілася ў віну галоўным чынам “нецэнзурная лаянка ў грамадскім месцы”.
Арт. 19.10 (“Прапаганда або публічнае дэманстраванне, выраб, распаўсюд нацысцкай сімволікі або атрыбутыкі”) — у 2021 годзе МУС прапанавала ўключыць нацыянальны бел-чырвона-белы сцяг разам з вітаннем “Жыве Беларусь!” у пералік нацысцкай сімволікі і атрыбутыкі. У выніковую пастанову ведамства ад 28 кастрычніка 2022 года “Аб вызначэнні пералікаў арганізацый і іншых структур, нацысцкай сімволікі і атрыбутыкі” было ўключана толькі вітанне, аднак дэ-факта ўлады пераследуюць грамадзян за сцяг або яго выяву.
Арт. 25.11 (“Невыкананне патрабаванняў прэвентыўнага нагляду або прафілактычнага назірання”) — прымяняецца для пакарання грамадзян, якія адбылі пакаранне паводле крымінальных артыкулаў, якія выкарыстоўваюцца для палітычнага пераследу, і знаходзяцца пад наглядам міліцыі.
Пастанова Савета міністраў будзе прымяняцца заднім чыслом: “Рашэнні аб прызнанні дзяцей, якія знаходзяцца ў сацыяльна небяспечным становішчы, прынятыя да ўступлення ў сілу гэтай пастановы, падлягаюць перагляду камісіямі па справах непаўналетніх гарадскіх, раённых выканаўчых камітэтаў, мясцовых адміністрацый раёнаў у гарадах у адпаведнасці з Палажэннем аб парадку прызнання дзяцей, якія знаходзяцца ў сацыяльна небяспечным становішчы і маюць патрэбу ў дзяржаўнай абароне, зацверджанай гэтай пастановай, на працягу шасці месяцаў пасля набыцця ёю моцы”.
Сярод мер “дзяржаўнай абароны” — пазбаўленне бацькоўскіх правоў і выняцце дзіцяці з сям’і.