Германія прыпыніла дзеянне пагаднення з Беларуссю аб прадухіленні двайнога падаткаабкладання

2 студзеня, Позірк. Федэральны ўрад Германіі паведаміў Беларусі пра прыпыненне з 1 студзеня 2025 года дзеяння пагаднення аб прадухіленні двайнога падаткаабкладання ў дачыненні да падаткаў на даходы і маёмасць, паведамляе прэс-служба Міністэрства фінансаў ФРГ.

Ведамства звярнула ўвагу на той факт, што 1 чэрвеня 2024 года Мінск прыпыніў “дзеянне асобных палажэнняў” гэтага пагаднення.

“Рэспубліка Беларусь не выканала патрабаванне ўрада Германіі аб аднаўленні дзеяння гэтых палажэнняў, — гаворыцца ў паведамленні. — Урад Германіі разглядае гэта як істотнае парушэнне пагаднення ў адпаведнасці з Венскай канвенцыяй аб праве міжнародных дагавораў. Калі Рэспубліка Беларусь скасуе частковае прыпыненне дзеяння пагаднення, урад Германіі разгледзіць магчымасць скасавання поўнага прыпынення пагаднення”.

Згаданае пагадненне было падпісанае 30 верасня 2005 года і набыло моц 31 снежня 2006-га. Гэтым дакументам бакі замацавалі жаданне “садзейнічаць развіццю ўзаемных эканамічных сувязей шляхам ліквідацыі падатковых перашкодаў”.

У Германіі дзеянне пагаднення распаўсюджвалася, напрыклад, на падаходны падатак (Einkommensteuer), падатак з карпарацый (Korperschaftsteuer), падатак на капітал (Vermogensteuer) і прамысловы падатак (Gewerbesteuer), у Беларусі — на падатак на даходы і прыбытак, падаходны падатак з фізічных асоб, падатак на нерухомасць і зямельны падатак.

7 сакавіка 2024 года Савет міністраў прыняў пастанову № 164 “Аб пытаннях падаткаабкладання”, якая ў тым ліку прыпыніла да канца 2026 года “выкананне палажэнняў міжнародных пагадненняў аб прадухіленні двайнога падаткаабкладання” адносна 27 краін Захаду, у тым ліку Германіі (адпаведны пункт набыў моц у чэрвені).

Дакумент часова спыніў дзеянне арт. 10 пагаднення — аб дывідэндах, арт. 11 — аб працэнтах, а таксама арт. 13 — аб даходах ад адчужэння маёмасці.