Прамых авіязносін паміж Цюменню і Мінскам не будзе — у РФ палічылі праект дарагім
4 студзеня, Позірк. Улады Цюменскай вобласці Расіі лічаць невыгодным арганізацыю прамога авіярэйса паміж сталіцамі рэгіёну і Беларусі.
Як паведамляе расійскае выданне “Дзелавы квартал” са спасылкай на інфармацыйны цэнтр абласнога ўрада, разлікі паказалі, што “кошт квітка ў адзін бок будзе арыентавана ў 2–4 разы вышэй, чым наяўны кошт з перасадкай у Маскве ці Санкт-Пецярбургу”.
“Разгледжаны варыянт субсідавання прамых авіязносін. Але з улікам кошту фінансавання і даходнай часткі абласнога бюджэту субсідаванне рэйса Цюмень — Мінск — Цюмень пакуль не плануецца”, — адзначылі ва ўрадзе.
21 сакавіка 2024 года тагачасны амбасадар Беларусі ў РФ Дзмітрый Круты (цяпер кіраўнік Адміністрацыі прэзідэнта) заявіў, што беларускі бок перадаў губернатару Цюменскай вобласці Аляксандру Моору “адпаведныя разлікі” па адкрыцці прамых авіязносін.
“Калі атрымаецца да яго візіту ў Мінск у другім паўгоддзі [2024 года] запусціць такі прамы авіярэйс, то гэта стане вельмі сур’ёзным штуршком да развіцця турызму”, — сказаў ён, удакладніўшы, што арганізаваць рэйс плануецца да канца 2024-га.
10 лістапада паведамлялася, што расійская авіякампанія Red Wings спыняе продаж квіткоў на рэйсы з Ульянаўска ў Мінск. Адзначалася, што рэйсы плануецца скасаваць як мінімум да сакавіка 2025 года.
“Праблема звязаная з тым, што абодва авіярэйсы (гаворка таксама ідзе пра пералёты з Ульянаўская ў Екацярынбург. — “Позірк”.) субсідуюцца, прычым кошт субсідавання авіярэйса ў Мінск з боку рэгіянальнага бюджэту даволі істотны”, — гаварылася ў публікацыі “Коммерсанта”.
Дзяржаўны сакратар Саюзнай дзяржавы (СД) Дзмітрый Мезенцаў 5 лістапада заявіў, што авіярэйсы паміж Беларуссю і расійскімі рэгіёнамі могуць атрымаць субсідыі з бюджэту СД.
Паводле яго слоў, такія авіязносіны адпавядаюць “запыту мільёнаў людзей”. “Будзем сумесна з [рэгіянальнымі] мінтрансамі адпрацоўваць гэту мадэль, прапануем яе публічна і, магчыма, на 2026 год выйдзем на этапны пілотны праект па падтрымцы такой працы за кошт саюзнага бюджэту”, — сказаў Мезенцаў у эфіры тэлеканала “Расія 24”.