Ціханоўская заклікала Польшчу не дапусціць удзелу Лукашэнкі ў перамовах аб міры ва Украіне

8 студзеня, Позірк. Польшча для Беларусі — “больш, чым проста сусед”, “гэта сімвал свабоды і салідарнасці”, “сімвал еўрапейскай будучыні”, заявіла дэмакратычны лідар Святлана Ціханоўская, выступаючы 8 студзеня ў Варшаве перад дэпутатамі Сейма і Сената.

“Для нас, беларусаў, Еўропа — гэта сям’я, у якую мы ўваходзім. І я заклікаю Сейм і Сенат Польшчы зрабіць еўрапейскую будучыню Беларусі ключавым прынцыпам вашай палітыкі і рашэнняў у дачыненні да нашай краіны“, — сказала палітык.

Выступ Ціханоўскай быў разбіты на некалькі тэматычных блокаў. Яна казала пра польскае старшынства ў Савеце ЕС у першым паўгоддзі 2025 года, рэпрэсіі і палітычных зняволеных у Беларусі, пытанні гарантавання бяспекі, супрацоўніцтва Польшчы з дэмсіламі з адначасовым працягам “палітыкі ізаляцыі рэжыму”.

Таксама дэмлідар адзначыла становішча беларусаў у Польшчы (уключаючы пытанні “легалізацыі і мабільнасці”) і, у прыватнасці, у Падляскім ваяводстве, падтрымку беларускай культуры і адукацыі, садзейнічанне незалежным СМІ і грамадзянскай супольнасці, сітуацыю ва Украіне і дапамогу беларускім добраахвотнікам.

Ціханоўская заклікала Польшчу “адкінуць так званыя прэзідэнцкія выбары” ў Беларусі, прызначаныя на 26 студзеня, падкрэсліўшы, што яны “больш падобныя на ваенную аперацыю, чым на дэмакратычны працэс”.

“Часам я чую, што, можа быць, нам варта дамовіцца з Лукашэнкам, абараніць яго ад Пуціна. Існуе памылковае меркаванне, што Лукашэнка абараняе беларускую незалежнасць. Не. Ён — пагроза беларускай незалежнасці, і яго адзіная мэта — захаваць сваю ўладу”, — заявіла палітык.

Яна таксама заклікала не дапусціць удзелу Лукашэнкі ў мірных перамовах па Украіне.

“Малаверагодна, што на такіх перамовах будуць прысутнічаць дэмакратычныя сілы, але мы спадзяемся, што Польшча будзе нашым голасам”, — сказала палітык.

Дэмлідар запрасіла парламентарыяў узяць удзел у прызначаным на 2–3 лютага ў Гданьску “Форуме Касцюшкі”, які будзе арганізаваны ў рамках польскага старшынства ў ЕС.

Трохдзённы візіт Ціханоўскай у Польшчу пачаўся 8 студзеня. Яго першым мерапрыемствам стала сустрэча з прэм’ер-міністрам Польшчы Дональдам Тускам, які заявіў, што Беларусь будзе “прыярытэтным напрамкам” у перыяд старшынства Варшавы ў ЕС.

Таксама 8 студзеня Ціханоўская сустрэлася са спікерам Сейма Польшчы Шымонам Галаўнёй, які запэўніў, што падчас старшынства ў ЕС Польшча “падтрымае імкненні беларусаў да свабоды”.