Сыранкоў абяцае ўвесці цэнзуру, узмацніць рэпрэсіі, крымінальна пераследваць прадстаўнікоў ЛГБТ

9 студзеня, Позірк. Купля “дарагіх і мала апраўданых патрэбамі простага чалавека“ прадметаў раскошы і наяўнасць празмерных багаццяў “павінны абкладацца падаткамі і зборамі“. Такі тэзіс змяшчаецца ў праграме кандыдата ў прэзідэнты, лідара праўладнай Камуністычнай партыі Беларусі Сяргея Сыранкова.

Яна апублікаваная на партыйным сайце.

У выпадку свайго абрання Сыранкоў абяцае “не дапускаць празмернага расслаення грамадства“: “Дзеля гэтага патрабуецца прытрымлівацца прынцыпу “бедны плаціць менш, а багаты больш”.

Кандыдат прапануе заканадаўча замацаваць “абавязацельствы прыватных суб’ектаў гаспадарання да выканання дабрачыннай дзейнасці“, а таксама настойвае на “паступовым павелічэнні падатку на прыбытак”.

Сыранкоў абяцае захаваць “пераемнасць палітычнага і сацыяльна-эканамічнага курсу”, які праводзіцца Аляксандрам Лукашэнкам.

У праграме падкрэсліваецца, што КПБ, вылучаючы свайго кандыдата, “ідзе на выбары не замест, а разам“ з Лукашэнкам.

Сцвярджаецца, што “сацыяльнае ўтрыманства і паразітызм разбэшчваюць грамадства“: “Сацыяльныя паразіты пазбягаюць працу, жывуць за кошт простых працаўнікоў, спараджаюць заганную сістэму ў грамадстве, распаўсюджваючы сацыяльныя хваробы“.

Сыранкоў абяцае “заканадаўча абавязаць ствараць прафсаюзныя арганізацыі на прадпрыемствах і ўстановах усіх формаў уласнасці”.

Як сказана ў дакуменце, КПБ лічыць, што “кантракты найму на абмежаваны тэрмін робяць работнікаў уразлівымі перад працадаўцамі”. Прапануецца “перавесці наёмных работнікаў на бестэрміновыя працоўныя дамовы з захаваннем усіх сацыяльных гарантый”.

У раздзеле аб медыцыне канстатуецца, што “ператок медыцынскіх кадраў з дзяржаўных ў камерцыйныя ўстановы аховы здароўя носіць сістэмны характар, што прыводзіць да кадравага дэфіцыту і зніжэння якасці і даступнасці якія прадстаўляюцца бясплатных паслуг у ахове здароўя”.

“Прапануем паступовае адзяржаўленне прыватных, камерцыйных медустаноў і адмова ад прадастаўлення платных паслуг“, — адзначае камуніст.

Таксама ён выступае супраць “камерцыялізацыі і прыватнай адукацыі“, паколькі ўкараненне платнай адукацыі зрабіла навучальныя ўстановы “закладнікамі платных паслуг“.

“Бачым патрэбу сёння пачаць працэс для паэтапнага зніжэння пенсійнага ўзросту да 55 гадоў для жанчын і 60 гадоў для мужчын за кошт павелічэння да 2% унёску работніка ў ФСАН“, — сказана ў праграме Сыранкова.

У пытанні цэнаўтварэння ён лічыць неабходным “крымінальна забараніць практыку сістэмы пасярэднікаў-перакупшчыкаў”.

За 10 гадоў Сыранкоў прапануе павялічыць фінансаванне навукі да 2% ВУП за кошт “стварэння Дзяржаўнага фонду прыярытэтных навуковых праграм, які б папаўняўся адлічэннямі ад чыстага прыбытку прадпрыемстваў краіны“.

Асаблівай праблемай называецца “засілле прыватных і замежных банкаў“, што дазваляе частцы сродкаў “знаходзіцца ў спекулятыўных прыватных руках“: “Прапануем паступовую нацыяналізацыю ўсёй банкаўскай сістэмы краіны і пераход яе да народнай банкаўскай структуры паводле галіновага прынцыпу (ашчадны, аграрны, прамыслова-будаўнічы, знешнеэканамічны і г.д. банкі)“.

Акрамя таго, у Канстытуцыі прапануецца замацаваць “забарону на прыватызацыю любых формаў дзяржаўнай уласнасці“ (стыль захаваны), а таксама “аднавіць права залатой акцыі дзяржавы ў дачыненні да ўсіх формаў уласнасці“.

Камуніст лічыць, што, нягледзячы на “намаганні дзяржавы па барацьбе з наступствамі 2020 года“, у Беларусі “застаецца дастатковую колькасць асоб, якія ўдзельнічалі ў спробе дзяржаўнага перавароту“ (так называюцца масавыя акцыі пратэсту супраць фальсіфікацыі вынікаў прэзідэнцкіх выбараў на карысць Лукашэнкі).

“Прапануем паглыбіць ачышчэнне сістэмы не толькі дзяржавы, але і ўсяго грамадства ад пярэваратняў, якія займаюць адказныя пасады і пампавалі сістэму ў 2020 годзе і затаіліся, якія чакаюць паслабленняў для аднаўлення сваёй тлятворнай актыўнасці“, — гаворыцца ў праграме.

Прапануецца ўвесці дзяржаўную цэнзуру друку, літаратуры, кінематографа, культуры і твораў культуры і мастацтва на “адпаведнасць ідэалогіі беларускага сацыялізму і ў мэтах недапушчэння маральнага, каштоўнаснага, ідэалагічнага і духоўнага разлажэння грамадства і краіны“.

На думку прадстаўніка КПБ, у Беларусі назіраецца “ўзмацненне маральнага раскладання грамадства, нягледзячы на дэкларацыі многіх аб прыхільнасці традыцыйным каштоўнасцям“.

У сувязі з гэтым праўладныя камуністы бачаць “патрэбу“ ў “больш выразных падыходах у маральна-этычнай палітыцы“ і выступаюць за “аднаўленне рэалізацыі прынцыпаў маральнага кодэкса будаўніка камунізму“.

Сыранкоў хоча забараніць дзейнасць казіно, азартныя гульні, “пачаць дзяржаўную барацьбу з праявамі распусты і садаміі, увесці крымінальную адказнасць за прапаганду і практыку ЛГБТ“.

“Асобна варта пачаць весці барацьбу з масавымі разводамі, якія, акрамя нізкага маральнага ўзроўню грамадзян і іх інфантыльнасці, таксама звязаныя з высокім узроўнем лібералізацыі працэдуры разводаў“, — пазначана ў дакуменце.

Прадстаўнік КПБ настойвае на аднаўленні помнікаў Іосіфу Сталіну, прапануе “вярнуць яго статус як вернага бацьку беларускай дзяржаўнасці”.

У моўным пытанні Сыранкоў выступае за “дзяржаўную падтрымку беларускай мовы і культуры, якія з’яўляюцца ўнікальным і непаўторным скарбам нашай краіны”.

Цэнтральная выбарчая камісія 23 снежня 2024 года зарэгістравала пяць кандыдатаў на пасаду прэзідэнта Беларусі на выбарах, якія адбудуцца 26 студзеня.

Акрамя Сыранкова гэта двое лідараў праўладных структур — Алег Гайдукевіч (Ліберальна-дэмакратычная партыя Беларусі) і Аляксандр Хіжняк (Рэспубліканская партыя працы і справядлівасці), а таксама Аляксандр Лукашэнка і былы сябра Аб’яднанай грамадзянскай партыі, дэпутат Палаты прадстаўнікоў у 2016—2019 гадах, удзельніца выбарчай кампаніі 2020 года Ганна Канапацкая.

Прэзідэнцкая кампанія праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца “спецаперацыяй па ўтрыманні ўлады”, праваабаронцы кажуць аб імітацыі канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.