Сусветная федэрацыя кёрлінга працягнула адхіленне зборных Беларусі і РФ

13 студзеня, Позірк. Савет Сусветнай федэрацыі кёрлінгу (ВФК) прыняў рашэнне прадоўжыць адхіленне спартсменаў з Беларусі і Расіі ад спаборніцтваў, якія праводзяцца пад эгідай федэрацыі, да канца сезона-2024/25, паведаміла 13 студзеня прэс-служба арганізацыі.

Папярэдняе рашэнне аб адхіленні было прынята ў ліпені мінулага года і было разлічана да канца 2024 года. Яно прадоўжана з-за асцярог, што ўдзел расіян і беларусаў можа “можа нанесці ўрон цэласнасці спаборніцтваў”.

Адзначаецца, што “Савет працягвае сачыць за праблемамі асацыяцый-членаў і спартсменаў, а таксама адсочвае дзеянні іншых спартыўных арганізацый, звязаныя з канфліктам і патэнцыйным вяртаннем да спаборніцтваў, і пакідае за сабой права перагледзець сваё рашэнне, калі спатрэбіцца”.

28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт (МАК) заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ з-за вайны супраць Украіны, аднак зазначыў, што ніводнаму спартсмену нельга забараняць удзельнічаць у спаборніцтвах “толькі з-за яго пашпарта”.

28 сакавіка 2024 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.

На летняй Алімпіядзе-2024 у Парыжы абмежаваную колькасць беларускіх атлетаў, якія выступалі ў нейтральным статусе, заваявалі чатыры медалі — залаты, два сярэбраныя і бронзавы, заняўшы віртуальнае 50-е месца ў агульным заліку.

20 снежня мінулага года стала вядома, што Міжнародны саюз канькабежцаў дазволіў абмежаванай колькасці індывідуальных спартсменаў з Беларусі і Расіі ўдзельнічаць у нейтральным статусе “на строгіх умовах” у кваліфікацыйных алімпійскіх спаборніцтвах сезона 2025/26.

Зборныя Беларусі і Украіны адхілены ад спаборніцтваў пад эгідай ВФК з сакавіка 2022 года.

Згодна з бягучым рэйтынгам на сайце арганізацыі, жаночая зборная Беларусі па кёрлінгу займае 45-ю пазіцыю з 49, мужчынская — 48-ю з 58.