На канец кастрычніка 2024 года было дабудавана 40% малочна-таварных комплексаў ад плана — дакумент

Апублікавана на адкрытай версіі “Позірку” 14 студзеня а 11.24.

13 студзеня, Позірк. На 21 кастрычніка 2024 года было пабудавана або рэканструявана менш за палову малочна-таварных комплексаў ад зацверджанага плана, вынікае з пратакола нарады, праведзенай у той дзень пад старшынствам міністра сельскай гаспадаркі і харчавання Анатоля Ліневіча.

Копію дакумента за подпісам кіраўніка ведамства перадало “Позірку” аб’яднанне былых сілавікоў BelPol.

У пратаколе ўказана, што нарада праходзіла ў фармаце відэаканферэнцыі. Акрамя чыноўнікаў Мінсельгасхарча, на ёй прысутнічалі прадстаўнікі аблвыканкамаў, райвыканкамаў, а таксама ААТ “Белаграпрамбанк”.

На нарадзе абмяркоўваліся тэмпы рэалізацыі ўказа Аляксандра Лукашэнкі, у адпаведнасці з якім да канца 2024 года трэба было завяршыць будаўніцтва або рэканструкцыю 60 малочна-таварных комплексаў (МТК).

Удзельнікі сходу канстатавалі, што “ў цяперашні час завершаныя будаўніча-мантажныя работы ў поўным аб’ёме на 24 аб’ектах” (40%), яшчэ на чатырох былі здадзеныя ў эксплуатацыю пускавыя комплексы (частка аб’екта, на якой ужо магчыма ажыццяўляць вытворчы цыкл не на поўную магутнасць).

У Брэсцкай вобласці было завершана будаўніцтва (рэканструкцыя) 5 аб’ектаў (плюс 4 пускавыя комплексы), Віцебскай — 1, Гомельскай — 9, Гродзенскай — 2, Мінскай — 3, Магілёўскай — 4.

Працягваліся работы на 36 аб’ектах. У Брэсцкай вобласці — на 5, Віцебскай — 9, Гомельскай — 1, Гродзенскай — 8, Мінскай — 7, Магілёўскай — 6.

“Паводле інфармацыі аблвыканкамаў, па стане на 15 кастрычніка 2024 года на будаўніцтва аб’ектаў <…> асвоена 946,7 млн рублёў, з іх крэдытных рэсурсаў ААТ “Белаграпрамбанк” — 463,5 млн рублёў або 96,6% ад запланаваных сродкаў”, — гаворыцца ў пратаколе.

У Брэсцкай вобласці на будаўніцтва (рэканструкцыю) МТК было выдаткавана 172 млн рублёў (у тым ліку 76,9 млн крэдытных сродкаў). Гатоўнасць недабудаваных комплексаў складала 93–100%, адзначаецца ў дакуменце.

У Віцебскай вобласці асвоілі 131,9 млн рублёў (77,6), гатоўнасць 6 недабудаваных аб’ектаў складала 57–75%, 3 — 75–85%.

Падкрэсліваецца, што “па аб’ектах з нізкай ступенню гатоўнасці” мясцовымі ўладамі дадзеныя “запэўніванні аб завяршэнні іх да 31 снежня 2024 года”. Удакладняецца, што гаворка пра СВК “Маяк Браслаўскі” (Браслаўскі раён, ступень гатоўнасці — 57%), УП “ТС Карпекі” (Полацкі, 57%), УП “Мярэцкія” (Глыбоцкі, 58%), ААТ “Маяк Высокае” (Аршанскі, 58%), УП “ДоўжаАгра” (Лёзненскі, 72%).

У Гомельскай вобласці на МТК выдаткавалі 173,3 млн рублёў (78,9). Гатоўнасць недабудаванага ААТ “Мікалаеўка” (Буда-Кашалёўскі раён) складала 71%, атрыманыя запэўніванні аблвыканкама аб завяршэнні работ да 15 лістапада 2024 года, паведамляецца ў дакуменце.

У Гродзенскай вобласці было асвоена 159,3 млн рублёў (71,9). Работы вяліся на 8 аб’ектах. Гатоўнасць КСУП “Ханчычы-Нёман” (Свіслацкі раён) складала — 55%, трох МТК — 72–80%, 4 — 80–95%. Заяўляецца аб гарантыях аблвыканкама аб заканчэнні будаўніцтва да канца 2024-га.

У Мінскай вобласці на МТК было накіравана 156,2 млн рублёў (79,1). Гатоўнасць 6 з 7 комплексаў ацэньвалася на ўзроўні 75–98%, на сельскагаспадарчым філіяле ААТ “Мінскаблаграсэрвіс” (ААТ “Будслаўскае”, Мядзельскі раён) работы былі завершаныя на 53%. У пратаколе таксама згаданыя запэўніванні мясцовых уладаў аб заканчэнні будаўніцтва да 31 снежня 2024 года.

У Магілёўскай вобласці было выдаткавана 154 млн. рублёў (79,1). Гатоўнасць 6 недабудаваных аб’ектаў складала 84–98%. Аб “запэўненнях” выканаць план не паведамляецца.

Па выніках нарады ўдзельнікі вырашылі, што аблвыканкамы павінны “прыняць меры па завяршэнні будаўніцтва (рэканструкцыі) малочна-таварных комплексаў у рамках рэалізацыі ўказа” Лукашэнка.

Ці былі выкананыя абавязацельствы да канца года, невядома.

23 снежня прэс-служба Мінсельгасхарча паведаміла пра візіт Ліневіча на УП “Мярэцкія”.

Адзначалася, што будаўнічыя работы на МТК “знаходзяцца на завяршальнай стадыі”, “практычна ўсе памяшканні гатовыя да эксплуатацыі, а на пляцоўцы працуюць звыш сотні спецыялістаў, якія займаюцца добраўпарадкаваннем тэрыторыі і мантажом абсталявання”.

Пры гэтым старшыня Глыбоцкага райвыканкама Аляксандр Шубскі заявіў, што “комплекс будзе гатовы прыняць першых жывёл ужо ў бліжэйшыя месяцы”.

29 кастрычніка на нарадзе аб эфектыўнасці работы аграпрамысловага комплексу Лукашэнка звязаў поспех на прэзідэнцкі выбарах з будаўніцтвам малочна-таварных комплексаў.

“Мы людзям павінны прама сказаць, што за наступную пяцігодку мы вырашым пытанне малочна-таварных комплексаў. Для таго каб атрымаць чыстае малако”, — сказаў Лукашэнка.

Ён звярнуўся да старшыні Мінскага абласнога камітэта Аляксандра Турчына са здагадкай, што “пару гадоў засталося” для “поўнага вырашэння праблемы”. Турчын адказаў, што неабходна “максімум тры гады”, пасля чаго Лукашэнка сказаў: “Пару гадоў. Дзесьці трэба падцягнуць Віцебскую, Магілёўскую і Гомельскую вобласці. Я не думаю, што там таксама такія вялікія праблемы пабудаваць гэтыя комплексы. Самае галоўнае, што мы ведаем, якія яны павінны быць і што нам трэба. Прытым гэта імпартазамяшчальны прадукт, тут імпартнага нам нічога не трэба, мы ўсё можам пабудаваць самі”.

На думку Лукашэнкі, кіраўніцтва Мінска павінна дапамагчы названым абласцям у будаўніцтве сучасных малочна-таварных комплексаў: “Калі мы ім не дапаможам, дык яны галасаваць за нас не будуць. Яны праваляць выбары. Таму трэба хаця б па адным комплексе паабяцаць ім, што мы пабудуем. Нават калі ты ў Мінску не знойдзеш цалкам грошай на гэта, дык я ўжо падстаўлю плячо (зварот да старшыні Мінгарвыканкама Уладзіміра Кухарава. — “Позірк”.)”.

Прэзідэнцкія выбары прызначаныя на 26 студзеня 2024 года. Кампанія праходзіць пад поўным кантролем дзяржорганаў і сілавых структур. Лукашэнка, які знаходзіцца ва ўладзе з 1994 года, рыхтуецца падоўжыць паўнамоцтвы на сёмы тэрмін.