У Ліпецку на маршруце задыміўся аўтобус МАЗ

15 студзеня, Позірк. Чарговае надзвычайнае здарэнне з аўтобусам Мінскага аўтамабільнага завода адбылося ў Расіі.

У Ліпецку, паводле паведамленняў мясцовых СМІ, 13 студзеня на прыпынку “Юных натуралістаў” па кірунку да аўтавакзала адбылося задымленне пасажырскага аўтобуса МАЗ, які рухаўся па маршруце № 315.

Пра здарэнне ў дзяжурную частку МНС паведамілі відавочцы.

Паводле даных Дэпартамента транспарту мэрыі абласнога цэнтра, пацярпелых няма, аўтобус накіраваны на рамонт.

Напярэдадні расійскае інтэрнэт-медыя “Фантанка” апублікавала інтэрв’ю з кіраўніком камітэта па транспарце мэрыі Санкт-Пецярбурга Валянцінам Янакаевым, у якім чыноўнік адзначыў, што “пасля першых інцыдэнтаў з узгараннямі” МАЗу “было дадзена даручэнне” з боку віцэ-губернатара Санкт-Пецярбурга Кірыла Палякова разабрацца з праблемай. Чыноўнік сцвярджае, што беларускае прадпрыемства вырашыла праблему.

Аўтобусы МАЗ рэгулярна загараюцца ў Расіі.

25 лістапада 2024 года ў Саратаве праз “тэхнічную няспраўнасць адбылося ўзгаранне рухавіка аўтобуса МАЗ муніцыпальнага маршруту № 19”, паведамляла прэс-служба мэрыі гэтага горада.

У Ленінградскай вобласці (РФ) 30 кастрычніка загарэўся чарговы аўтобус МАЗ. На апублікаваным відэа ён цалкам ахоплены агнём. Пра прычыны ўзгарання не паведамлялася.

Беларусь гатовая “цалкам задаволіць” патрэбы Санкт-Пецярбурга ў сучасным пасажырскім транспарце, заявіў 25 кастрычніка на пасяджэнні 14-га Савета дзелавога супрацоўніцтва Беларусі і Санкт-Пецярбурга прэм’ер-міністр Раман Галоўчанка.

Чыноўнік сцвярджае, што кантракты з Санкт-Пецярбургам для такіх прадпрыемстваў “заўсёды ў прыярытэце”, у прыватнасці, Беларусь хоча пастаўляць у горад “новыя мадэлі беларускіх аўтобусаў, тралейбусаў, электробусаў, трамваяў”. З гэтай мэтай беларускі бок гатовы “прапаноўваць вельмі выгадныя фінансавыя варыянты ўзаемадзеяння пры заключэнні такіх кантрактаў”, сказаў Галоўчанка.

22 кастрычніка паведамлялася аб узгаранні ў Самары аўтобуса МАЗ (2018 год выпуску), які знаходзіўся на канцавым прыпынку ля гандлёвага цэнтра, пасажыраў у ім не было. Прычынай, паводле папярэдняй інфармацыі, стала няспраўнасць электраправодкі.

3 студзеня ў Санкт-Пецярбургу загарэўся аўтобус маркі “МАЗ”, які належыць кампаніі “Домтрансаўта”.

Паводле даных расійскіх СМІ, у гэтым горадзе ў 2023 годзе загарэлася не менш за дзевяць аўтобусаў мінскага аўтазавода. Годам раней было зафіксавана восем падобных выпадкаў.

“У сувязі з наяўнасцю заўваг, якія патэнцыйна могуць прывесці да ўзгарання аўтобусаў, прынята рашэнне аб прыпыненні эксплуатацыі на гарадской маршрутнай сетцы 137 аўтобусаў Мінскага аўтамабільнага завода (МАЗ 203047). Яны паступілі ў Пецярбург па кантрактах 2022 года”, — паведаміла 2 жніўня 2023 года прэс-служба дзяржпрадпрыемства “Пасажыраўтатранс”.

У адказ на запыт віцэ-губернатара Санкт-Пецярбурга Кірыла Палякова ў чэрвені 2022 МАЗ паведаміў, што прычынай узгаранняў можа быць “трапленне алею з сістэмы гідрапрывада вентылятара на гарачыя часткі рухавіка”.

“Ва ўмовах санкцыйнага ціску і парушэнні лагістычных ланцужкоў пры пастаўках камплектаў гідрапрывада магла адбыцца замена правераных фланцаў на іншыя, аналагічныя па тэхнічных характарыстыках, але не маюць правераных рэферэнцый”, — растлумачыў чыноўнік.

Выпадкі з загараннем аўтобусаў Мінскага аўтазавода фіксаваліся таксама ў Беларусі.

Праблему з беларускімі аўтобусамі ўскосна прызнаў Лукашэнка, які заявіў 19 верасня 2023 года на сустрэчы з губернатарам Краснадарскага краю РФ Веніямінам Кандрацьевым, што прычына ўзгаранняў пасажырскага транспарту ў Пецярбургу крыецца ў адсутнасці “якаснага і своечасовага абслугоўвання”. Ён прапанаваў наладзіць тэхабслугоўванне на месцы сіламі беларускіх рамонтнікаў.

На прэс-канферэнцыі 25 кастрычніка намеснік галоўнага канструктара па грузавой тэхніцы ААТ “Мінскі аўтамабільны завод” Мікалай Лакотка заявіў, што прычынамі частага ўзгарання тэхнікі прадпрыемства ў РФ з’яўляецца парушэнне ўмоў і правілаў эксплуатацыі.

Паводле яго слоў, тэхніка “стала вельмі цяжкая, энерганасычаная, таму ўмовы эксплуатацыі і правілы эксплуатацыі ніхто не адмяняў”.

У 2024 годзе МАЗ рэалізаваў на расійскім рынку 504 новыя аўтобусы (за 2023-ы — 925 адз.; -45,5%). Беларускае прадпрыемства заняло 9-е месца па продажах сярод усіх прадстаўленых на рынку марак. Яго доля склала 2,6%.