РФ мае абавязацельствы па гарантаванні бяспекі Беларусі — Пяскоў
16 студзеня, Позірк. Расія мае абавязацельствы па гарантаванні бяспекі “саюзніка Беларусі” як у рамках Саюзнай дзяржавы, так і “ў рамках іншых прынятых рашэнняў”, заявіў 16 студзеня прэс-сакратар прэзідэнта РФ Дзмітрый Пяскоў.
Такім чынам ён пракаментаваў журналістам заяву дзяржсакратара Савета бяспекі Беларусі Аляксандра Вальфовіча “пра план Захаду захапіць сіламі беларускіх радыкалаў раён краіны”, паведамляе ТАСС.
На ўдакладненне, ці значыць гэта, што “Расія не пакіне Беларусь у бядзе”, прэс-сакратар Уладзіміра Пуціна адказаў: “Абсалютна дакладна”.
У апублікаваным 16 студзеня інтэрв’ю выданню “СБ. Беларусь сёння“ Вальфовіч абвінаваціў праціўнікаў у намеры захапіць частку краіны. “Паводле наяўных звестак, разглядаецца магчымасць задзейнічання <…> экстрэмісцкіх фарміраванняў ва ўзброенай аперацыі па захопе аднаго або некалькіх прыгранічных раёнаў Беларусі, абвяшчэнні гэтай тэрыторыі “свабоднай” і ўводзе туды заходнімі краінамі нейкага “міратворчага” кантынгенту”, — заявіў ён.
Пад “экстрэмісцкімі фарміраваннямі”, як вынікае з публікацыі, Вальфовіч мае на ўвазе “камандна-каардынацыйны цэнтр “Паспалітае рушэнне”, які, паводле яго слоў, створаны ў Польшчы “для кіраўніцтва працэсамі навучання баевікоў”. Чыноўнік таксама згадаў пра нейкіх членаў “розных экстрэмісцкіх фарміраванняў, якія складаюцца з беларускіх радыкалаў”, што нібыта праходзяць “вайскова-дыверсійную падрыхтоўку” ва Украіне “з прыцягненнем спецыялістаў украінскіх і заходніх спецслужбаў і спецпадраздзяленняў”.
Дзяржсакратар Савета бяспекі заявіў, што “гэтыя падраздзяленні задзейнічаюцца ў баявых аперацыях УСУ супраць расійскіх войскаў, у якіх беларускія экстрэмісты набываюць баявы досвед”.
У адзіны дзень галасавання на выбарах дэпутатаў парламента і мясцовых саветаў, 25 лютага 2024 года, Лукашэнка на выбарчым участку заявіў пра “планы збеглых” (так ён называе беларусаў, якія эмігравалі з палітычных прычын) па “захопе асобнага невялікага населенага пункта, у прыватнасці, называліся Кобрын і Маларыта“. Кобрынскі і Маларыцкі раёны Брэсцкай вобласці мяжуюць з Украінай і знаходзяцца непадалёк ад мяжы з Польшчай.
“Кавалачак захапіць, уладу абвясціць, усе прызнаюць гэтую ўладу, улада звернецца ў НАТО, будуць уведзеныя войскі. Гэта не блеф. Такія абмяркоўваюцца планы. Мы інфармуем вас па ўсіх кірунках”, — заявіў тады Лукашэнка.
Такім чынам, у інтэрв’ю 16 студзеня Вальфовіч “пашырыў” названыя гіпатэтычныя планы да “аднаго або некалькіх прыгранічных раёнаў Беларусі”.
Кабанчук назваў хлуснёй словы Вальфовіча пра нібыта існыя планы захапіць прыгранічча Беларусі
16 студзеня, Позірк. Дзяржсакратар Савета бяспекі Беларусі Аляксандр Вальфовіч замест таго, каб "прызнаць рэальныя праблемы, якія стаяць перад краінай", займаецца "стварэннем міфаў пра "захоп раёнаў" і "замежных баевікоў", заявіў прадстаўнік па абароне і нацыянальнай бяспецы Аб'яднанага пераходнага кабінета (АПК) Вадзім Кабанчук. "Гэта …