Візіт Лукашэнкі ў Кітай не адбыўся ў анансаваныя тэрміны

21 студзеня, Позірк. Візіт у Кітай Аляксандра Лукашэнкі не адбыўся ў анансаваныя тэрміны, вынікае з паведамленняў яго прэс-службы.

Пра візіт, які адбудзецца “ў бліжэйшы час”, Лукашэнка заявіў 23 снежня на нарадзе па пытаннях развіцця машынабудаўніцтва.

3 студзеня прэс-служба паведаміла, што ён адправіцца ў Кітай да прэзідэнцкіх выбараў.

На сустрэчы з старшынямі аблвыканкамаў і Мінскага гарвыканкама Лукашэнка тады сказаў: “І міжнародныя візіты, у Кітай візіт. Такія візіты, ад якіх нельга адмовіцца. Таму што гэта будучыня нашай дзяржавы. Што такое сустрэча з Сі Цзіньпінам і візіт у Кітай? Гэта будучыня нашай краіны. Супрацоўніцтва з Кітаем — гэта вялікая справа”.

Паводле яго слоў, на візіт “дні тры сыдуць”. “Вернешся назад — там адзін тыдзень застанецца да галасавання”, — удакладніў Лукашэнка.

Да выбараў, прызначаных на 26 студзеня, засталося менш за тыдзень.

Пра планы Лукашэнкі наведаць Кітай больш не паведамлялася. Папярэдні раз Лукашэнка наведваў КНР 3–4 снежня 2023 года.

Раней не адбыўся яшчэ шэраг анансаваных сустрэч Лукашэнкі з замежнымі лідарамі.

3 чэрвеня 2024 года прэм’ер-міністр Раман Галоўчанка заявіў, што Беларусь увосень наведае прэзідэнт Казахстана Касым-Жамарт Такаеў. Пра яго намеры здзейсніць візіт “у межах паўгода” паведамляў 9 сакавіка тагачасны амбасадар гэтай цэнтральнаазіяцкай краіны Ерлан Байжанаў.

Такаеў у Беларусь не прыехаў.

У кастрычніку 2022 года Лукашэнка анансаваў візіт у Турцыю, які таксама не адбыўся.

26 лютага 2024 года, віншуючы прэзідэнта Турцыі Рэджэпа Таіпа Эрдагана з 70-годдзем, ён выказаў надзею на “хуткую сустрэчу, якая, безумоўна, адкрые новую старонку ў адносінах Мінска і Анкары”.

29 кастрычніка Лукашэнка заявіў, што па-ранейшаму гатовы скарыстацца запрашэннем Эрдагана наведаць яго краіну.