На платформе фонду BySol для блогера Ермашука, які з’ехаў з Беларусі, сабралі 5,5 тыс. еўра
21 студзеня, Позірк. Для гродзенскага блогера Вадзіма Ермашука (Vadimati), які з’ехаў з Беларусі, на платформе фонду салідарнасці BySol сабралі больш за 5,5 тыс. еўра.
Першапачаткова на падтрымку экс-палітвязня прасілі 5 тыс. еўра.
Пра тое, што Ермашук пакінуў краіну, стала вядома 4 снежня. 1 снежня паведамлялася, што кантэнт старонкі блогера ў “Інстаграме” прызнаны “экстрэмісцкімі матэрыяламі”. На момант унясення ў “экстрэмісцкі спіс”, куды ўлады з палітычных матываў дадаюць непажаданыя крыніцы інфармацыі, старонка ўжо была выдаленая.
Ермашук зрабіў гэта пасля просьбы да карыстальнікаў адпісацца ад яго старонкі, паколькі ў судзе Ленінскага раёна Гродна 27 лістапада разглядаўся датычны да яго іск “аб прызнанні інфармацыйнай прадукцыі экстрэмісцкімі матэрыяламі”.
16 жніўня 2021 года Ермашука затрымалі ў Шчучыне (Гродзенская вобласць), куды ён накіраваўся здымаць відэаролік. На наступны дзень сілавікі агледзелі яго дом. Мужчыну арыштавалі ў адміністрацыйным парадку — спачатку на 25 сутак, затым яшчэ на 15 сутак.
Пасля стала вядома, што ў дачыненні да блогера распачалі справы па арт. 368 (абраза прэзідэнта) і 370 (знявага дзяржсімвалаў) Крымінальнага кодэкса.
21 снежня таго ж года суд Шчучынскага раёна (суддзя Дзмітрый Ціунчык) прыгаварыў Ермашука да 3 гадоў пазбаўлення волі ва ўмовах агульнага рэжыму.
Мужчына адбыў тэрмін і выйшаў на волю 26 чэрвеня 2024 года.
Ужо ў бяспецы Ермашук распавёў журналістам пра прэсінг і нададзены яму ў бабруйскай калоніі № 2 (Магілёўская вобласць) “нізкі сацыяльны статус” (у Беларусі практыка аднясення да гэтай неафіцыйнай касты асуджаных, што пазбаўлены многіх правоў, існуе шмат у чым з ухвалення адміністрацый устаноў пенітэнцыярнай сістэмы).
Звязана гэта было з тым, што сілавікі апублікавалі зняты схаванай камерай відэазапіс сэксуальнага кантакту блогера з іншым мужчынам.
“Мы там былі як самыя апушчаныя, дно, рабы”, — сказаў Ермашук у інтэрв’ю “Наша Ніве”. Паводле яго слоў, у калоніі з “нізкім статусам” было каля 100 чалавек, ці каля 5%. Для іх была прадугледжаны асобны рукамыйніца, у некаторых атрадах — асобны туалет, у сталовай — асобны стол. З людзьмі з “нізкім статусам” нельга было вітацца, падаваць руку, нешта ад іх браць. Блогер паведаміў, што ў атрадзе праз свой статус “заўсёды мыў прыбіральні”. 40 дзён мужчына правёў у штрафным ізалятары.
“Пры тым, што ў многіх гвалтаўнікоў не было такога статусу: яны вельмі добра злівалі інфармацыю, былі добрымі інфарматарамі. І вось асуджаны, які адкусіў саскі дзяўчыне, той, хто ў заложніках трымаў маленькую дзяўчынку, гвалтаваў яе, недапалкі гасіў аб яе — ён хадзіў у высокім статусе, паважаны, а мянты яго прыкрывалі”, — казаў Ермашук.
Паводле слоў блогера, яго як асуджанага з “нізкім статусам” не пускалі ў праваслаўную царкву, таму мужчына наведваў сходы пратэстанцкай — баптысцкай — супольнасці.