Сенат Польшчы прыняў рэзалюцыю па выбарах у Беларусі, назваўшы іх “спробай легітымізацыі дыктатуры”

22 студзеня, Позірк. Рэзалюцыю “па несправядлівых выбарах прэзідэнта Беларусі” прыняў 22 студзеня Сенат Польшчы. Верхняя палата польскага парламента вяла анлайн-трансляцыю пасяджэння, на якім быў зацверджаны дакумент.

Прадстаўляючы рэзалюцыю, сенатар і старшыня парламенцкай групы “За свабодную Беларусь” Гжэгаж Схетына адзначыў, што Сенат Польшчы “заклікае правесці ў Беларусі свабодныя і сумленныя выбары пад міжнародным наглядам з гарантыяй незалежнага назірання за гэтымі выбарамі, бяспечнага працэсу галасавання, роўных шанцаў для ўсіх кандыдатаў і свабоды СМІ”.

Згодна з агучаным тэкстам рэзалюцыі, Сенат падкрэслівае, што “незалежнасць Беларусі з’яўляецца бясспрэчнай каштоўнасцю, надзвычай важнай для стабільнага будучага рэгіёну і ўсёй Еўропы”, а таксама тое, што “Беларусь не можа стаць імперскім трафеем Расіі”.

“Мы перакананыя, што ў будучым Беларусь далучыцца да сям’і дэмакратычных еўрапейскіх дзяржаў”, — падкрэсліў сенатар.

Як адзначана ў дакуменце, цяпер “адсутнічаюць умовы і інстытуцыйныя рамкі для правядзення свабодных і сумленных выбараў у Рэспубліцы Беларусь”. Звяртаецца ўвага на тое, што прэзідэнцкія выбары пройдуць 26 студзеня 2025 года — на шэсць месяцаў раней за тэрмін, “калі яны маглі б быць праведзеныя ў адпаведнасці з законам”.

“Усе апазіцыйныя партыі, незалежныя прафсаюзы і арганізацыі грамадзянскай супольнасці былі ліквідаваныя, — гаворыцца ў тэксце рэзалюцыі. — Незалежныя СМІ забароненыя, а ў турмах зараз знаходзіцца больш за 1.300 палітычных зняволеных, якія павінны быць неадкладна вызваленыя. Не створаныя ўмовы для бяспечнага захоўвання выбарчых бюлетэняў і празрыстага падліку галасоў, а асобы ўсіх членаў выбарчых камісій засакрэчаныя”.

Адзначаецца, што незалежных назіральнікаў не дапускаюць да ўдзелу ў выбарах, “а асобы, якія назіралі за папярэднімі выбарамі і падтрымлівалі апазіцыйных кандыдатаў, зазнаюць пераслед”. Выбаршчыкаў “запалохваюць, каб яны ўзялі ўдзел у выбарах”.

“Сапраўдная выбарчая кампанія знаходзіцца пад яшчэ большым кантролем уладаў, чым папярэднія, сумленнасць якіх была пастаўленая пад сумнеў міжнароднымі арганізацыямі. Сярод кандыдатаў няма палітычнай альтэрнатывы Лукашэнку, а каля паўмільёна выбаршчыкаў, вымушаных пакінуць Беларусь праз рэпрэсіі, былі пазбаўленыя права голасу”, — адзначаецца ў дакуменце.

У сувязі з гэтым Сенат Польшчы лічыць, што “выбары 26 студзеня 2025 года будуць толькі спробай легітымізацыі дыктатуры, і іх вынікі не могуць быць прызнаныя міжнароднай супольнасцю”.

“Мы заяўляем пра гатоўнасць да супрацоўніцтва з прадстаўнікамі грамадзянскай супольнасці Беларусі, у прыватнасці з Каардынацыйнай радай, якую мы разглядаем як беларускі парламент у эміграцыі”, — падкрэсліў сенатар.