Паліцыя Польшчы выявіла факты нелегальнага працаўладкавання беларусаў

23 студзеня, Позірк. У канцы 2024 года паліцыя выявіла 34 выпадкі нелегальнага працаўладкавання замежнікаў у Гдыні (Паморскае ваяводства), сярод іх былі грамадзяне Беларусі, паведамляе Памежная ахова Польшчы.

Адзначаецца, што супрацоўнікі паліцыі праверылі законнасць працаўладкавання 329 замежнікаў у дзвюх кампаніях Гдыні. У выніку было ўстаноўлена, што з парушэннем заканадаўства працуюць таксама грамадзяне Калумбіі, Грузіі і Украіны. У асноўным, як паведамляецца, замежнікі былі занятыя ў “вытворчасці мяса, на будаўнічых працах, працавалі трактарыстамі”.

Дакладных даных па колькасці нелегальна працаўладкаваных ведамства не назвала.

Падкрэсліваецца, што працадаўцы, якія дапусцілі парушэнні, могуць быць аштрафаваныя. “Замежнікі таксама могуць сутыкнуцца з наступствамі за незаконнае выкананне працы”, — гаворыцца ў паведамленні памежнай службы.

З 2021 года больш за 240 тыс. грамадзян Беларусі падалося на атрыманне дазволу на знаходжанне ў Польшчы, паведаміў у снежні “Позірку” намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка, спасылаючыся на даныя, атрыманыя ў МУС краіны.

З іх ужо звыш 140 тыс. мае сапраўдны дакумент, які дае права на знаходжанне на тэрыторыі Польшчы, дадаў палітык.

У 2024 годзе міжнародную абарону ў Польшчы атрымала 2,6 тыс. грамадзян Беларусі, у 2023-м — 2,9 тыс. Пры гэтым летась беларусамі пададзена 3,9 тыс. заяў аб яе прадастаўленні (у 2023-м — 3,7 тыс.). Адмовы за мінулы год атрымала 150 чалавек.

Няўрадавы Цэнтр беларускай салідарнасці са спасылкай на даныя ўпраўлення паведамляў, што на 31 снежня 2023 года ў Польшчы пражывала 118.562 грамадзяніна Беларусі з дакументамі, якія тым ці іншым чынам легалізуюць іх у краіне. Сярод іх часовы від на жыхарства мелі 69.399 чалавек, пастаянны ВНЖ — 39.553, дадатковую абарону — 6.555, дазвол на знаходжанне доўгатэрміновага рэзідэнта ЕС — 1.160, статус бежанца — 578, часовую абарону — 436, іншыя падставы — 881.