Украіна не бачыць падстаў для кантактаў з Лукашэнкам, таму пытанне яго легітымнасці не актуальнае — МЗС

23 студзеня, Позірк. Кіеў “пакуль не бачыць” ніякіх перадумоў для аднаўлення кантактаў з Аляксандрам Лукашэнкам, таму пытанне вызнання яго легітымнасці для Украіны “не актуальнае“, заявіў 23 студзеня на брыфінгу афіцыйны прадстаўнік Міністэрства замежных спраў гэтай дзяржавы Георгій Тыхы.

“26 студзеня ў Беларусі адбудзецца галасаванне, якое хацелася б назваць прэзідэнцкімі выбарамі, калі б на гэта былі падставы, — прыводзіць словы Тыхага прэс-служба знешнепалітычнага ведамства. — Для нас у гэтым дзействе няма нічога нечаканага. І вынікі яго, у прынцыпе, загадзя вядомыя”.

Для Кіева відавочна, што Лукашэнка “працягне заставацца хаўруснікам і саўдзельнікам [прэзідэнта РФ Уладзіміра] Пуціна ў ягонай вайне супраць Украіны, якая адбываецца насуперак інтарэсам беларускага народа”.

МЗС лічыць, што “абодва дыктатары працягнуць імітаваць бурную барацьбу з так званымі “пагрозамі калектыўнага Захаду“, якімі яны запалохваюць сваіх грамадзян”.

Украіна салідарная з пазіцыяй дзяржаў — членаў Еўрапейскага саюза, ЗША, Канады, Вялікабрытаніі і іншых дэмакратычных краін адносна адсутнасці ў Беларусі “базавых умоў для правядзення сумленных і празрыстых выбараў у адпаведнасці са стандартамі АБСЕ“.

Спікер МЗС нагадаў, што тая частка беларускіх грамадзян, якая знаходзіцца за мяжой, “фактычна пазбаўленая права ўдзелу ў выбарах”.

“Некаторыя з іх, мы ведаем, былі вымушаныя пакінуць радзіму ў выніку палітычных пераследаў рэжыму Лукашэнкі. Яны не маюць магчымасці вярнуцца, бо будуць арыштаваныя, затрыманыя. Таму гэта таксама істотна ўплывае на вынікі любых галасаванняў”, — падкрэсліў Тыхы.

Кіеў мяркуе, што беларускі народ заслугоўвае права “абіраць уладу на сапраўды дэмакратычных, свабодных, канкурэнтных выбарах і будаваць уласную будучыню без дыктату Расіі, без яе імперскіх замахаў і без імкнення Масквы навязаць сваім суседзям ролю падкантрольных муртадаў, як цяпер адбываецца”.

Тыхы падзякаваў беларусам, якія са зброяй у руках ваююць на баку Украіны.

Еўрапейскі парламент (ЕП) на пасяджэнні 22 студзеня прыняў рэзалюцыю “Неабходнасць дзеянняў, накіраваных на барацьбу з працягам рэпрэсій і фальшывымі выбарамі ў Беларусі“.

Прэзідэнцкая кампанія 2025 года праходзіць пад поўным кантролем уладаў. Палітычнае поле краіны цалкам зачышчана ад рэальных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць аб імітацыі канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.