ЕС: Калі пераможца вядомы загадзя — гэта не выбары

24 студзеня, Позірк. Запланаваныя на 26 студзеня прэзідэнцкія выбары ў Беларусі — гэта “практыкаванне, якое з’яўляецца цалкам недэмакратычным, яны з’яўляюцца поўнай прафанацыяй, гэта не выбары — калі вы загадзя ведаеце пераможцу“. Такую заяву на брыфінгу 24 студзеня зрабіла прэс-сакратар Еўрасаюза па знешніх справах і палітыцы бяспекі Аніта Хіпер.

Яна адзначыла, што ў ЕС “працягваюць падтрымку беларускага народа, ціснуць на рэжым“. “Мы зрабілі гэта ў снежні мінулага года, прыняўшы пакет санкцый супраць Беларусі, які закрануў тых, хто нясе адказнасць за парушэнні правоў чалавека“, — адзначыла Хіпер.

Паводле яе слоў, ЕС “працягвае прыцягваць увагу грамадскасці да ўсіх беларускіх палітычных зняволеных, несправядліва затрыманых, а таксама заклікаць беларускія ўлады вызваліць гэтых людзей і спыніць рэпрэсіі“.

Хіпер таксама нагадала пра выдаткаванне ЕС у снежні мінулага года 30 млн еўра на падтрымку грамадзянскай супольнасці ў Беларусі, адзначыўшы павелічэнне агульнай сумы дапамогі да 170 млн еўра.

22 студзеня беларускае МЗС абвінаваціла структуры ЕС у “найгрубейшым умяшальніцтве ў электаральныя працэсы“. Асновай для дэмаршу стаў нібыта “наяўны ў распараджэнні“ праект заявы Еўрапейскай службы знешніх дзеянняў (ЕСЗД), якую плануецца зрабіць пасля выбараў 26 студзеня “на падставе яшчэ не прынятай рэзалюцыі Еўрапейскага парламента“ (была ўхваленая ў той жа дзень. — “Позірк“.).

Прэс-сакратар знешнепалітычнага ведамства Анатоль Глаз заявіў пра наяўнасць у дакуменце “традыцыйнага набору клішэ аб падтрымцы ЕС дэмакратычных правоў і фундаментальных свабод“. Ён назваў гэта “чыстай крывадушнасцю“ на фоне “незаконных санкцый, якімі Еўрасаюз абклаў звычайных беларускіх грамадзян“.

Глаз сцвярджаў, што, “калі падобная заява ЕСЗД будзе прынятая, яна стане чарговым доказам запланаванага ўмяшальніцтва з боку Еўрасаюза ва ўнутраныя справы іншых краін, а таксама спробай прыкрыць і легалізаваць свае злачынныя дзеянні ў дачыненні да Рэспублікі Беларусь“, што з’яўляецца “непрымальным“ для суверэннай Беларусі. “Любыя падобныя спробы атрымаюць адпаведны адказ“, — прыгразіў прадстаўнік МЗС.

“Даследаваная намі заява ЕСЗД таксама сведчыць пра тое, што еўрапейская дыпламатыя чарговы раз распіваецца ў сваім бяссіллі на фоне гатоўнасці Беларусі знаходзіць рашэнне канкрэтных практычных выклікаў, у ліку якіх, напрыклад, трансгранічныя пытанні“, — заявіў Глаз.

Сёмыя прэзідэнцкія выбары ў Беларусі прызначаныя на 26 студзеня 2025 года (датэрміновае галасаванне праходзіць 21–25 студзеня).

Шэраг заходніх краін і інстытутаў ужо заявіў пра тое, што не намераны прызнаваць іх вынікі.

Прэзідэнцкая кампанія 2025 года праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады“, праваабаронцы гавораць пра імітацыю канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі празрыстай і адпаведнай дэмакратычным стандартам.