Ціханоўская заклікала ЕС уключыць “дэмакратычную Беларусь” у праграмы Усходняга партнёрства

27 студзеня, Позірк. Працягнуць палітыку ізаляцыі Аляксандра Лукашэнкі з адначасовай “падтрымкай простых беларусаў” заклікала дэмакратычны лідар Святлана Ціханоўская, выступаючы перад міністрамі замежных спраў краін ЕС 26 студзеня ў Брусэлі. Пра гэта паведаміў “Позірку” галоўны дарадца палітыка Франак Вячорка.

Сустрэча, паводле яго слоў, адбылася па запрашэнні вярхоўнага прадстаўніка Еўрасаюза па замежных справах і палітыцы бяспекі Каі Калас, у ёй таксама ўдзельнічала камісар па пытаннях пашырэння ЕС Марта Кос.

На мерапрыемстве абмяркоўваліся “непрызнанне “бязвыбараў” і Лукашэнкі, мірныя перамовы па Украіне, візавыя і легалізацыйныя пытанні, а таксама падтрымка грамадзянскай супольнасці і дэмакратычных сіл Беларусі”, сказаў дарадца Ціханоўскай.

У сваім выступе дэмлідар заклікала ўдзельнікаў сустрэчы “паказаць беларусам, што Еўропа з’яўляецца альтэрнатывай “рускаму свету”, а таксама “ўключыць дэмакратычную Беларусь у праграмы Усходняга партнёрства”.

Ціханоўская таксама заклікала еўрапейскіх дыпламатаў у выпадку мірных перамоваў па Украіне дамагацца вываду расійскіх войскаў з Беларусі і далейшага неўмяшання Крамля ва ўнутраныя справы краіны. Яна адзначыла, што “Лукашэнка прадстаўляе інтарэсы Расіі, а не Беларусі”.

Акрамя гэтага, палітык заявіла пра неабходнасць прыкласці “ўсе магчымыя палітычныя і дыпламатычныя намаганні” для вызвалення беларускіх палітвязняў, а таксама “ўзмацніць ціск і санкцыі з патрабаваннем спынення рэпрэсій”.

Падрабязнасці даступныя падпісчыкам “Позірк+“