Канада ўвяла санкцыі супраць 22 фізічных і юрыдычных асоб Беларусі, уключаючы КДБ, АМАП і ГУБАЗіК
27 студзеня, Позірк. Аб увядзенні санкцый у дачыненні да 10 фізічных і 12 юрыдычных асоб Беларусі паведаміў 27 студзеня ўрад Канады.
Юрыдычнымі асобамі, у дачыненні да якіх уведзеныя канадскія санкцыі, сталі Атрад міліцыі асаблівага прызначэння (АМАП), Галоўнае ўпраўленне па барацьбе з арганізаванай злачыннасцю і карупцыяй (ГУБАЗіК) МУС, Камітэт дзяржаўнай бяспекі (КДБ), ААТ “Станкагомель”, ААТ “Беларускі металургічны завод” (БМЗ, Жлобін, Гомельская вобласць), ААТ “Завод “Легмаш” (Орша, Віцебская вобласць), канструктарскае бюро “Беспілотныя верталёты”, ТАА “Лабараторыя аддытыўных тэхналогій”, ТАА “Рухсэрваматор”, Мінскі падшыпнікавы завод, Мінскі завод шасцерняў (усе — Мінск) і віцебскае ААТ “Вістан”.
У санкцыйныя спісы Канады ўключаны фізічныя асобы: Галіна Лукашэнка (афіцыйная жонка Аляксандра Лукашэнкі); жонка і дзеці камандзіра АМАП ГУУС Мінгарвыканкама Дзмітрыя Балабы Вольга Маршаловіч, Арцём Балаба і Максім Балаба; жонка і сын намесніка міністра МУС — камандуючага ўнутранымі войскамі Мікалая Карпянкова Ірына і Мікалай Карпянковы; дырэктар “Легмаша” Уладзіслаў Паўленка, дырэктар КБ “Беспілотныя верталёты” Уладзімір Чудакоў, генеральны дырэктар БМЗ Анатоль Савёнак і начальнік ГУБАЗіК МУС Андрэй Ананенка.
Адзначаецца, што Канада ўводзіць санкцыі “ў сувязі з грубымі і сістэматычнымі парушэннямі правоў чалавека рэжымам Лукашэнкі ў Беларусі, а таксама яго падтрымкай парушэння Расіяй суверэнітэту і тэрытарыяльнай цэласнасці Украіны”.
“Палажэнне аб спецыяльных эканамічных мерах накладае на пералічаных асоб забарону на вядзенне спраў (фактычна замарожванне актываў), забараняючы асобам у Канадзе і канадцам за межамі Канады весці справы з любой маёмасцю гэтых фізічных і юрыдычных асоб або прадастаўляць ім фінансавыя або звязаныя з імі паслугі”, — гаворыцца ў паведамленні.
Пералічаным фізічным асобам забараняецца ўезд у Канаду.
27 студзеня санкцыі супраць Беларусі пашырыла Вялікабрытанія. Як адзначаў МЗС гэтай дзяржавы, гэта было зроблена “ў каардынацыі” з Канадай. У абодвух спісах значацца “Легмаш”, КБ “Беспілотныя верталёты” і начальнік ГУБАЗіК Ананенка.
Апошні раз Канада ўводзіла санкцыі ў дачыненні да беларускіх юрыдычных і фізічных асоб 9 жніўня мінулага года, прымеркаваўшы гэта да чацвёртай гадавіны “ашуканскіх прэзідэнцкіх выбараў”.