За Лукашэнку прагаласавала 86,82% выбаршчыкаў — ЦВК (дапоўнена)

Дададзеныя лічбы праўладнага экзіт-полу і суадносіны галасоў за Лукашэнку і Уладзіміра Пуціна на апошніх прэзідэнцкіх выбарах у Расіі

27 студзеня, Позірк. За Аляксандра Лукашэнку на “выбарах прэзідэнта Рэспублікі Беларусь” прагаласавала 86,82% выбаршчыкаў, заявіў старшыня Цэнтрвыбаркама Ігар Карпенка на прэс-канферэнцыі ноччу 27 студзеня.

Паводле яго слоў, за Сяргея Сыранкова (Камуністычная партыя Беларусі) аддадзена 3,21% галасоў, Алега Гайдукевіча (Ліберальна-дэмакратычная партыя Беларусі) — 2,02%, Ганну Канапацкую (былы член Аб’яднанай грамадзянскай партыі, дэпутат Палаты прадстаўнікоў у 2016-2019 гадах, удзельніца выбарчай кампаніі 2020 года) — 1,86%, Аляксандра Хіжняка (Рэспубліканская партыя працы і справядлівасці) — 1,74%. Супраць усіх — 3,60%.

Лічба за Лукашэнку абвешчаная меншая, чым за Уладзіміра Пуціна на апошніх прэзідэнцкіх выбарах у Расеі ў 2024 годзе (87,28%). Праўладны экзіт-пол даваў Лукашэнку больш галасоў, чым Пуціну — 87,6%. У Сыранкова было 2,7%, Гайдукевіча — 1,8%, Канапацкай — 1,6%, Хіжняка — 1,2%, супраць усіх — 5,1%. Найбольшая хібнасць — у галасах супраць усіх (1,5 працэнтных пункта ў бок змяншэння). Менавіта да такога галасавання заклікаў Аб’яднаны пераходны кабінет Святланы Ціханоўскай.

Яўка выбаршчыкаў склала 85,70% агульнай колькасці ўключаных у спісы для галасавання, паведаміў раней ЦВК. Гэта больш, чым у 2020 годзе (84,38%), але менш, чым у рэкордным 2006-м (92,94%).

Датэрмінова прагаласавала 41,81% (новы рэкорд).

У Магілёўскай вобласці афіцыйная яўка склала 92,64%, у Гомельскай — 91,54%, Брэсцкай — 90,56%, Гродзенскай — 89,28%, Мінскай — 86,71%, Віцебскай — 86,39%, у Мінску — 69,72%.

Дэмакратычныя краіны адмовіліся прызнаваць сёмыя выбары прэзідэнта Беларусі.

У 2020 годзе за Лукашэнку, паводле сцвярджэння ЦВК, прагаласавала 80,1% выбаршчыкаў, за Канапацкую — 1,67%.