Мінулым днём практычна на ўсіх метэастанцыях Беларусі зафіксаваныя тэмпературныя рэкорды
28 студзеня, Позірк. Тэмпературныя рэкорды дня за ўвесь перыяд інструментальных метэаназіранняў зафіксаваныя 27 студзеня практычна на ўсіх метэастанцыях Беларусі, сведчыць праведзены “Позіркам” параўнальны аналіз аператыўных і архіўных даных Белгідрамета.
Абноўлены таксама абсалютны рэкорд дня: у Пінску паветра прагрэлася да 12,8 градуса цяпла. Ранейшы трымаўся 42 гады (10 градусаў 27 студзеня 1983 года ў Брэсце).
У самім Пінску лакальны максімум перавышаны на 5 градусаў (было 7,8 у 1983 годзе), у Брэсце — на 2,4 (цяпер новы экстрэмум складае 12,4 градуса).
У Мінску таксама перапісаны рэкорд 1983 года — 9 градусаў супраць 5,5. Абнавіліся максімумы ў Віцебску (8,3 супраць 4,3 у 1990 годзе) і Магілёве (6,6 супраць 5,3 тады ж). У Гродне лакальны гістарычны рэкорд паўтарыўся (8,9 у 1983 годзе).
Агулам экстрэмумы абнавіліся на 44 з 48 метэастанцый, за якімі вядзецца назіранне (з даступным архівам). Ніжэй за гістарычную тэмпература была ў Гомелі, Лельчыцах і Мазыры.
28 студзеня сіноптыкі чакаюць да 12 градусаў пры абсалютным рэкордзе дня 10,5 (у 1983 годзе ў Высокім). Гэты паказчык ужо перавышаны: у 14 гадзін у Брэсце паветра прагрэлася да 10,9 градуса.