Ціханоўская: Участкі для галасавання былі паўпустыя

30 студзеня, Позірк. Аб нізкай фактычнай яўцы на прэзідэнцкія выбары ў Беларусі заявіла дэмакратычны лідар Святлана Ціханоўская ў інтэрв’ю расійскаму тэлеканалу “Дождь”.

“Што нам кажуць нашыя людзі “з зямлі”, скажам так, нашыя беларусы ў краіне — што, насамрэч, участкі [для галасавання] былі напаўпустыя. Не было адчування нейкага дзеяння”, — сказала палітык.

“Вядома, людзей заганялі. І нам дасылалі інфармацыю, што пагражалі звальненнямі, калі не пойдзеце галасаваць”, — дадала яна.

Ціханоўская нагадала словы кіраўніка МУС Івана Кубракова, які ўвечары 26 студзеня заявіў, што “такіх спакойных выбараў” у краіне “яшчэ не было”.

“Яны былі стэрыльныя. Яны першапачаткова такімі рыхтаваліся, таму што рэпрэсіі павялічваліся перад гэтым “дзеяннем”, — падкрэсліла дэмлідар.

Паводле папярэдніх звестак Цэнтрвыбаркама, на мерапрыемстве, якое афіцыйны Мінск лічыць “прэзідэнцкімі выбарамі”, Аляксандр Лукашэнка атрымаў 5.136.293 галасы (86,82%).

Канчатковыя вынікі будуць падведзены 3 лютага.

Яўка, як сцвярджае ЦВК, склала 85,7% ад агульнай колькасці ўключаных у спісы для галасавання. Гэта больш, чым на прэзідэнцкіх выбарах у 2020 годзе (84,38%), але менш, чым у рэкордным 2006-м (92,94%).

Прадстаўнікі многіх дэмакратычных краін і міжнародных арганізацый ужо заявілі, што не прызнаюць вынікі выбараў і Лукашэнку ў якасці прэзідэнта Беларусі.

Выбары прайшлі на фоне беспрэцэдэнтнага ўзроўню рэпрэсій.